Служба преподобнымъ отцемъ старцемъ, иже въ Оптинѣ пустыни подвизавшимся.

Служба преподобнымъ отцемъ старцемъ,
иже въ Оптинѣ пустыни подвизавшимся.

На велицѣй вечерни
поемъ Блаженъ мужъ: 1-ый антифонъ.
На Господи воззвахъ: стихиры на 8, гласъ 4-ый:
Подобенъ: Яко добля:

Преподобніи старцы оптинстіи,/ вы иго Христово вземше,/ постомъ и молитвами/ и частыми бдѣніи потрудившеся,/ просіясте надеждею и вѣрою,/ наипаче же любовію,/ яже есть глава добродѣтелемъ,/ еюже согрѣвасте/ приходящыя къ вамъ. (Дважды).

Послушанія усердніи подвижницы,/ воли своя покорившіи/ окормленію отецъ своихъ,/ духовнѣ васъ породившихъ,/ воспріясте помощь на сопротивника/ глубочайшее смиреніе,/ имже разрушисте козни вражія:/ ничтоже бо можетъ врагъ/ на смиренныя.

Православныхъ людей окормителіе,/ вы апостольски взывасте:/ ничтоже ны разлучить отъ любве Божія./ вы хуждшее покористе лучшему/ и плоть поработисте духу./ Тѣмъ явистеся свѣтильницы Церкве,/ не подъ спудомъ, но на свѣщницѣ поставлени,/ да прославятъ Отца Небеснаго/ видящіи дѣла ваша.

Ины стихиры, гласъ 8-ый:
Подобенъ: О преславнаго чудесе!

О преславнаго чудесе!/ Посредѣ житейскія молвы/ отцы богомудріи/ несмущено сердце сохраниша,/ пребывающе съ человѣки тѣлеснѣ,/ мысленнѣ же Богу предстояще,/ покрываеми кровомъ крилу Его,/ носящіи духъ миренъ,/ имже многи ко Христу привлекоша. (Дважды).

О молитвенницы пребогатіи,/ Духа Святаго органи,/ глагоюще молитву непрестанную/ въ сердцѣ сокрушенномъ и смиренномъ,/ просіясте ангельскимъ безстрастіемъ,/ и сего ради показастеся/ врачеве душамъ и тѣлесемъ:/ пощадите и спасите насъ,/ многими страстьми обуреваемыя.

О старцы преподобніи,/ Духа Святаго сосуди,/ дарованіи благодатными/ наздавшіи Церковь Христову,/ вы поревновасте духовнымъ,/ пророчества даръ стяжавше,/ глаголюще человѣкомъ полезная/ въ назиданіе и утѣшеніе,/ пророкомъ древнимъ уподобльшеся.

Слава, гласъ 6-ый:

Узы разрѣшше страстей,/ прилѣпистеся любви благихъ,/ во Христа облекостеся,/ воздержаніемъ и смиреніемъ наслѣдницы бывше вышняго живота:/ тѣмже отъ трудовъ обрѣтше упокоеніе,/ достойно радуетеся съ горними силами,/ преподобніи отцы оптинстіи:/ прегрѣшеній оставленіе испросите/ празднующимъ любовію святую память вашу.

И нынѣ, богородиченъ, гласъ тойже: Кто Тебе не ублажитъ:
Входъ, прокименъ дне, и чтенія три:

На литіи стихира, гласъ 2-ый:

Яви намъ дивныи во святыхъ своихъ Богъ,/ новыя подвижники благочестія,/ преподобныя старцы оптинскія,/ иже въ Бозѣ пребывающе,/ узрѣша Христову доброту,/ осіяеми тайно божественными свѣтлостьми.

Гласъ 4-ый:

Не дасте сна очесемъ вашимъ, блаженніи,/ ни вѣждомъ дреманія,/ дондеже достигосте въ любовь Божію,/ яже изліяся изобильно на вы:/ тѣмже воспріясте божественная дарованія,/ душетлѣнныя страсти исцѣляете,/ и недуги вѣрою врачуете,/ и отгоните скверныя духи:/ отцы преподобніи, молите о душахъ нашихъ.

Слава, гласъ 5-ый:

Пріидите, благочестія ревнители,/ отцы наша духовныя похвалимъ:/ Леонида, Моисея и Антонія,/ Исаакія, Макарія и Анатолія,/ съ нимиже Иларіона и Варсанофія,/ со Іосифомъ великаго Амвросія,/ инаго Анатолія и Нектарія,/ и мученикъ Никона и Исаакія./ Старцевъ великихъ пѣсньми почтимъ,/ къ нимже взывающе возопіимъ:/ преподобніи отцы богомудріи,/ не престайте о насъ молящеся,/ вы бо есте заступницы наши.

И нынѣ, богородиченъ, гласъ тойже: Храмъ и дверь еси:

На стиховнѣ стихиры, гласъ 4-ый:
Подобенъ: Званный свыше:

Возложился еси Вседержителю,/ отче преподобне Льве,/ егда душа твоя/ распалися божественнымъ желаніемъ,/ и умъ твой къ горнимъ окрили./ Тогда міръ оставилъ еси,/ и вся яже въ мірѣ,/ и послѣдовалъ еси Христу/ невозвратнымъ помысломъ,/ ничтоже предпочетъ паче любве Его./ Его же моли/ спасти и просвѣтити душы наша.

Стихъ: Честна предъ Господемъ смерть преподобныхъ Его.

Отъ юности, преподобне Макаріе,/ Бога возлюбивъ,/ Тому вседушно послѣдовалъ еси,/ ничтоже предпочетъ сущихъ въ мірѣ./ но вся уметы вмѣнивъ,/ потщался еси благоугодити Богу,/ заповѣдьми Его утверждаяся:/ тѣмже желанія конечнаго достигъ,/ Христу предстоиши,/ Его же моли/ спасти и просвѣтити души наша.

Стихъ: Что воздамъ Господеви о всѣхъ, яже воздаде ми;

Преподобне отче Амвросіе,/ любовь совершенную/ къ Богу и ближнимъ стяжалъ еси/ яже есть союзъ совершенства,/ и сый инокомъ украшеніе,/ и живущимъ въ мірѣ утѣшеніе,/ собралъ еси инокинь чреды,/ всѣмъ бывъ вся по апостолу,/ привелъ еси чада своя ко Владыцѣ,/ Его же моли/ спасти и просвѣтити души наша.

Слава, гласъ 8-ый:

Свѣтомъ Троическимъ осіявшеся, отцы преподобніи,/ Тьмы избѣжасте сластей,/ и свѣтильницы явистеся, просвѣщающе вѣрныхъ сердца./ Тѣмъ же свѣтоносную память совершающе, согласно взываемъ:/ богоносніи и пребогатіи, молите Христа Бога,/ согрѣшеній оставленіе даровати чтущимъ святую память вашу.

И нынѣ, богородиченъ, гласъ той же: Безневѣстная Дѣво:

Тропарь, гласъ 1-ый:

Въ молитвахъ непрестанныхъ пребывающе,/ благія же и злыя любовію объемлюще, преподобніи старцы Оптинстіи,/ Богу и ближнимъ послужисте,/ бдѣніемъ, слезами и пощеніемъ дарованіе многоразличныхъ чудесъ пріясте./ Слава давшему намъ таковыя ходатаи,/ слава Прославльшему васъ,/ слава Богу дивному во святыхъ Своихъ.

Слава, и нынѣ, богородиченъ: Гавріилу вѣщавшу Тебѣ, Дѣво:

На утрени.

На Богъ Господь: тропарь преподобнымъ, дважды.
Слава, и нынѣ, богородиченъ.

По первомъ стихословіи сѣдаленъ, гласъ 8-ый.
Подобенъ: Повелѣнное:

Страсти безсловесныя душевными силами покорше преподобніи, словесному вашему стаду благодѣянія подаваете, отъ Христа Бога дарованіемъ исцѣленій обогащшеся. Тѣмъ же священное ваше и свѣтоносное торжество совершающе, просимъ очищенія душамъ нашимъ. (Дважды).

Слава, и нынѣ, богородиченъ:

Богорадованная, Чистая, Благословенная, за милосердіе щедротъ изъ Тебе Рождьсягося, съ преподобными отцы и старцы, и со всѣми святыми, о насъ моли непрестанно, дати намъ прежде конца прощеніе грѣховъ, и житія исправленіе: яко да обрящемъ милость.

По второмъ стихословіи сѣдаленъ, гласъ 8-ый.
Подобенъ: Повелѣнное:

Великихъ даровъ сподобльшеся, преподобніи, во смиренномъ житіи на земли пожисте, туне недугующихъ страсти врачующе, явистеся ангеломъ собесѣдницы, всеблаженніи отцы Оптинстіи: и наша страсти молитвами вашими уврачуйте. (Дважды).

Слава, и нынѣ, богородиченъ:

Непостижимаго Слова Сына Божія, несказанно паче ума изъ Тебе Рождьсягося, Богородице, моли съ преподобными, умиреніе чисто вселеннѣй подати, и прегрѣшеній даровати намъ прежде конца прощеніе, и Царствія Небеснаго, крайнія ради благости, сподобити рабы Твоя.

Поліелей и величаніе:

Ублажаемъ васъ, преподобніи отцы Оптинстіи, и чтемъ святую память вашу, наставницы монаховъ и собесѣдницы ангеловъ.

Псаломъ избранный: Терпя потерпѣхъ Господа:

По поліелеи сѣдаленъ, гласъ 1-ый.
Подобенъ: Гробъ Твой Спасе:

Неизреченна святыхъ благодать, юже отъ Христа пріяша: тѣмъ же вѣрою призываеми, неисцѣльныя болѣзни исцѣляютъ, и мощи ихъ божественною силою дѣйствуютъ чудеса: молитвами ихъ, Господи, и насъ душевныхъ и тѣлесныхъ страстей свободи, яко Человѣколюбецъ.

Слава, и нынѣ, богородиченъ:

Матерь Тя Божію свѣмы вси, Дѣву воистину и по рождествѣ явльшуюся, иже любовію прибѣгающіи къ Твоей благости: Тебе бо имамы грѣшніи предстательство, Тебе стяжахомъ въ напастѣхъ спасеніе, Едину Всенепорочную.

Степенна, 1-ый антифонъ 4-го гласа.

Прокименъ, гласъ 4-ый: Честна предъ Господемъ смерть преподобныхъ Его.
Стихъ: Что воздамъ Господеви о всѣхъ, яже воздаде ми;

Евангеліе отъ Матѳея, зачало 43-е.

По 50-омъ псалмѣ стихира, гласъ 6-ый:

Все отринувше страстное мучительство, и всяко умышленіе лукаваго змія поправше о Христѣ, преподобніи отцы Оптинстіи, свѣтообразни явистеся, яко свѣтила озаряюще всю подсолнечную, тьму отгоняюще, и недуги благодатію врачующе, и всѣмъ помощницы являющеся, вѣрою творящимъ святую память вашу.

Канонъ Богородицѣ на 6-сть, гласъ 8-ый: Воду прошедъ:
И преподобнымъ на 8, гласъ той же.

Пѣснь 1-ая: Ирмосъ: Воду прошедъ:

Монашествующимъ вы правило есте, въ недузѣхъ сущимъ и скорбящимъ исцѣлители, и пастыріе заблуждающихъ овецъ, вамъ научите пѣснь достойно принести.

Наставники наша восхваляюще зовемъ: вы есте сѣмя свято, преподобніи отцы, земли россійскія хваленіе, и чадомъ вашимъ утвержденіе.

Стадоначальниче монашескихъ дворовъ, чреды наставивъ иноковъ къ небеснѣй пажити, радуйся отче нашъ, Паисіе честный, наставивый земли россійскія концы.

Слезами многими и скорбнымъ житіемъ Ѳеодоръ, инокъ свирскій, злая претерпѣ, обаче твердъ и крѣпокъ сый умомъ, въ болѣзнѣхъ сына Льва духовно породи.

Богородиченъ: О Мати Дѣво Богородице. Христа моли, воплощшагося изъ Тебе, да сохранитъ россійскую страну, и души наша, яко милостивъ, спасетъ.

Пѣснь 3-тья: Ирмосъ: Небеснаго круга:

Основаніе твердо подвигомъ положилъ еси, камень краеугольный, Христа: и бысть первоначальникъ сонму старцевъ, о Льве, и пріятъ благодать отгоняти недуги отъ лютѣ страждущихъ.

Вопіялъ еси сице, о Льве, ко обидящимъ: пою Богу моему донде же есмь, кто мене разлучитъ отъ любве Его; въ ней же пребысть до кончины, совершая волю Его со дерзновеніемъ.

Преподобный Макарій блаженъ бысть воистину, насыти бо алчущихъ души, туне питая всѣхъ словомъ исполненнымъ благодати, потребляя душевный гладъ, умиряя души страстьми обуреваемыя.


Богородиченъ: Отъ Тебе, Богомати, истече потокъ сладкій, вся напаяя люди, скверны душъ измывая, о Богородице Дѣво: тѣмъ же спасай отъ бѣдъ всѣхъ иже образъ Твой честный почитающихъ.

Сѣдаленъ, гласъ 4-ый:
Подобенъ: Явился еси:

Явистеся Духа Святаго органи, отцы преподобніи, и пророчества дара сподобистеся: ибо въ вашихъ душахъ возсія Свѣтъ Неприступный.

Слава, и нынѣ, богородиченъ:

Яко всѣхъ еси твореній вышшая, воспѣвати Тя достойно недоумѣюще, Богородице, молимъ Тя: туне помилуй насъ.

Пѣснь 4-ая: Ирмосъ: Услышахъ Господи:

О мудрѣйшій Макаріе, ты восторгалъ еси класы духовныя отъ писаній святыхъ отецъ, и насытилъ еси души алчущихъ.

Ты наставникъ бывъ инокомъ во Предтечи обители, о Антоніе, воздержательнымъ житіемъ: помолися о тя восхваляющихъ.

Моѵсее, Антоніе, и по плоти и по духу суще братіе, богомудріи пастыри, вы настависте овцы на пажити.

Богородиченъ: Богородице Чистая, цвѣте божественный и прозябшій кореню, Ты о насъ непрестанно моли, Богородицу Тя воспѣвающихъ.

Пѣснь 5-ая: Ирмосъ: Просвѣти насъ:

Пріятъ Елисей отъ Иліи благодать сугубую, на тебѣ же, отче Амвросіе, благодать почи отецъ Льва и Макарія.

О Амвросіе, ты любовь въ себѣ стяжалъ еси, совершеніе добродѣтелей: всѣмъ бо вся былъ еси, и убогимъ прибѣжище.

О Амвросіе, ты божественною пищею напиталъ еси алчущія сердца, овцы своя упасъ на словеснѣй пажити.

Богородиченъ: Мати Божія, и заступнице усердная, просвѣти насъ молящихся Тебѣ, присно молящи о насъ, недостойныхъ рабѣхъ Твоихъ.

Пѣснь 6-ая: Ирмосъ: Молитву пролію ко Господу:

Сынъ истинный явился еси Іосифе, стяжавъ родительницу безстрастія, нелицемѣрное послушаніе: и яко кротокъ, чистъ же и милостивъ, смиренно глаголалъ еси: непотребенъ есмь безъ отца моего.


Іосифъ цѣломудренный вѣрно по стопамъ отца своего хождаше: даже до смерти самъ себе смиряше, сице Владыцѣ Христу подражая. Сего ради молимъ его: научи и насъ грѣшныхъ смиренію.

Отца своего любовь стяжавъ, Анатоліе, съ нимъ упаслъ еси словесное стадо: и нынѣ, отче, насъ не забуди, овцы своя помяни и настави ихъ, взыщи заблуждающихъ чадъ, наставляя всѣхъ насъ ко спасенію.

Богородиченъ: Заступницу Тя вѣмъ въ животѣ моемъ, и хранительницу тверду Дѣвице, и напастей рѣшащу молвы, и прилоги бѣсовъ отгоняющу, и сице молюся всегда: отъ страстей моихъ мя да избавиши.

Кондакъ, гласъ 8-ый:
Подобенъ: Взбранной:

Иже отъ міра суетнаго уклонившеся,/ и честнымъ житіемъ сокровище обрѣтше,/ попеченія о грѣшныхъ, сущихъ въ мірѣ, не оставистѣ:/ но яко суще заблуждающимъ наставницы, / и насъ отъ суеты мірскія избавите, яко да зовемъ:/ радуйтеся, старцы богомудріи.

И к о с ъ :

Ангеломъ поревновавше, устранистеся міра, вожделѣвше въ пустыню вселитися: но и насъ, сущихъ въ мірѣ еще, не забудите, молимся мы, грѣшніи, да прелести избавльшеся, къ вамъ возглаголемъ сице: Радуйтеся, врачеве душевныхъ болѣзней, радуйтеся, цѣлители недуговъ тѣлесныхъ. Радуйтеся, премудрыхъ разумомъ превосходящіи, радуйтеся, немудрыхъ къ разуму наставляющіи. Радуйтеся, непрестанныя молитвы дѣлателіе, радуйтеся, о грѣшницѣхъ къ Богу ходатаи. Радуйтеся, старцы богомудріи.

Пѣснь 7-ая: Ирмосъ: Отъ Іудеи дошедше отроцы:

Отче Иларіоне, уклонився отъ міра, и вся яже въ немъ оставль и уметы вмѣнивъ, старцемъ прилѣпися, Леониду съ Макаріемъ, власть отъ Христа пріятъ бѣсы прогоняти.

Утѣшаше Исаакій сострадательный инокъ, иже къ нему приходящихъ, и силою молитвы отъ злыхъ ихъ ограждаше, заступая ихъ всячески, яко отецъ или мати сый чадомъ своимъ.

Нѣсть пророка безъ чести, но въ дому своемъ токмо, всѣхъ бо изгнаша пророкъ: и ты изгнанъ бывъ, отче, сподобися блаженства, Варсонофіе праведне, изгнаніе претерпѣвый правды ради.

Богородиченъ: Подъ Твою милость прибѣгающихъ вѣрно и покланяющихся Твоему Сыну Богородительнице, помолися Ему о насъ, яко да избавимся отъ бѣдъ и искушеній.

Пѣснь 8-ая: Ирмосъ: Царя Небеснаго:

Славѣ вѣчнѣй причастникъ бысть Нектарій, уклонився житейскія славы: всякъ бо смиряяй себе вознесется.

Да ублажатся отцы: Анатолій, Нектарій, съ ними же Исаакій и Никонъ: законно пострадавше, ликуютъ во вся вѣки.

Бывше изгнани отцы отъ отступникъ, не смутишася, но возопиша: наше житіе на небесѣхъ есть.

Богородиченъ: Помощи, яже отъ Тебе требующія, не презри Дѣво, поющія и превозносящія Тя во вѣки.

Пѣснь 9-ая: Ирмосъ: Воистину Богородицу:

Воистину стяжасте всяку добродѣтель, дарованіе же даровася вамъ: но спасите стадо ваше, молящеся за ны.

О всемъ благодарите, заповѣдь пріяхомъ: да похвалимъ Бога, яко даровалъ есть намъ васъ, наставники святыя во Царствіе Его.

Предстателіе наши, о странѣ Россійстѣй помолитеся прилѣжно, и спасите всѣхъ, иже память вашу вѣрно совершающихъ.

Богородиченъ: Владычице Святая, помогай намъ грѣшнымъ, и злыхъ враговъ избави Отечество наше: Тебе молимъ, сохрани насъ подъ кровомъ Твоимъ.

Свѣтиленъ. Подобенъ: Небо звѣздами:

Старцы почтимъ богомудрыя, свѣтильники свѣтлыя, подвижники благочестія, добродѣтелей учители, о насъ молитвенники вѣры.

Слава, и нынѣ, богородиченъ:

Сладость ангеловъ, скорбящихъ радость, христіанъ Предстательнице, Дѣво Мати Господня, заступи насъ, и избави вѣчныхъ мукъ.

На хвалитехъ стихиры, гласъ 6-ый:
Подобенъ: Все отложше:

Все отложше/ о земныхъ попеченіе,/ и страстей мучительство/ далече отъ себе отринувше,/ преподобніи отцы богомудріи,/ въ пустыню вселистеся,/ и сердце очистивше,/ просвѣтистеся благодатію,/ и яко свѣтила возсіявше,/ просвѣщаете всю подсолнечную,/ тьму отгоняще отъ чтущихъ/ святую память вашу.

Духовная свѣтила,/ на тверди церковнѣй возсіявшая/ въ послѣдняя времена,/ наставляютъ къ тихому пристанищу/ обуреваемыхъ въ пучинѣ/ и житейскими сластьми погружаемыхъ,/ грѣховную мглу отгоняютъ,/ и бурю страстей утишаютъ,/ и отъ злаго пути возбраняютъ,/ приводящаго въ пагубу,/ и со дерзновеніемъ молятся/ о спасеніи душъ нашихъ.

Не къ тому въ гаданіихъ,/ но истиною и лицемъ къ лицу,/ зерцаломъ разрѣшшимся,/ зрите славу Господню,/ ихже очи не видѣша/ и уши не слышаша,/ и на сердце человѣческомъ не взыдоша,/ яже уготова Богъ любящимъ Его./ Сихъ благихъ сподобльшеся,/ и насъ не забудите, но молите и намъ спастися,/ совершающимъ память вашу.

Слава, гласъ 8-ый:

Воздвигше крестъ на рамена своя,/ и плоть распенше со страстьми и похотьми,/ сотросте зміеву главу:/ и насъ явите побѣдители грѣха,/ и покаянія достойныя плоды приносити научите.

И нынѣ, богородиченъ, гласъ той же:

Владычице, пріими молитву рабъ Твоихъ,/ и избави насъ отъ всякія нужды и печали.

Славословіе великое. Тропарь, слава, и нынѣ, богородиченъ.

На литургіи.

Блаженна отъ канона, пѣснь 3-я и 6-я на 8-мь.

Прокименъ, гласъ 7-ый: Честна предъ Господемъ смерть преподобныхъ Его.

Стихъ: Что воздамъ Господеви о всѣхъ, яже воздаде ми;

Апостолъ къ Галатомъ, зачало 213-ое.

Аллилуія, гласъ 6-ый: Блаженъ мужъ бояйся Господа, въ
заповѣдехъ Его восхощетъ зѣло
.

Стихъ: Сильно на земли будетъ сѣмя Его.

Евангеліе отъ Луки, зачало 24-ое.

Причастенъ: Радуйтеся праведніи о Господѣ, правымъ подобаетъ
похвала.

Конецъ и Богу нашему слава.

 

 

Hosted by uCoz