Каѳисма 1.

Псаломъ 1.

Блаженъ мужъ, иже любитъ имя Твое, Приснодѣво Мати Маріе: благодатію Твоею душа его утвердится, и яко древо, при исходищахъ водъ насажденное, множайшія плоды правды изнесетъ. Благословенна Ты въ женахъ ради смиренія и вѣры сердца Твоего; всѣхъ бо женъ побѣждаеши красотою Твоею, превосходиши Ангеловъ и Архангеловъ святынею, милости и щедроты Твоя вездѣ проповѣдуются; Богъ дѣла рукъ Твоихъ благословилъ есть.

Псаломъ 2.

Госпоже, чесо ради шаташася языцы, стужающіи ми? Бурею ужаса и страха посрами и низложи ихъ; да покрыетъ насъ десница Твоя: расточи тучи беззаконій нашихъ, возьми бремя грѣховъ нашихъ. Пріидите къ Ней вси труждающіися и обремененніи и упокоитъ васъ, приступите къ Ней въ напастехъ вашихъ, и освѣтитъ васъ просвѣщеніе лица Ея; благословите Ю всѣмъ сердцемъ вашимъ: милости бо Ея полна земля.

Псаломъ 3.

Госпоже, что умножишася видимыя и невидимыя врази, стужающіи ми? Бурею праведнаго гнѣва Твоего да развѣеши ихъ. Помилуй мя, Госпоже, и исцѣли немощи моя, согрѣй оледенѣлое сердце мое и не предаждь мене въ руки душевныхъ враговъ моихъ; въ день смерти моея предстани въ помощь души моей, приведи мя ко пристанищу спасенія. Слава Тебѣ, безпомощныхъ Заступнице.

Пѣснь вмѣсто славы.

Тя, Матерь Божію, хвалимъ, Тя, Марію Приснодѣву и Богородицу, исповѣдуемъ, Тя, отъ Превѣчнаго Отца избранную, вся земля величаетъ; Тебѣ вси Ангели и Архангели, Тебѣ вси Начала смиренно служатъ; Тебѣ вси Власти и превышнія Силы небесныя, и вся Господствія повинуются; Тебѣ вси Престоли, Тебѣ Херувими и Серафими радующеся предстоятъ, Тебѣ вси ангельскія лики непрестаннымъ гласомъ вопіютъ: Пресвятая Богородице Маріе, Мати Приснодѣво! полны суть небеса и земля величества славы чрева Твоего; Тебе преславный апостольскій ликъ своего Творца и Спасителя Матерь восхваляютъ; Тебе мучениковъ множество Богородицу величаютъ; Тебе преславный исповѣдниковъ ликъ Святыя Троицы храмъ нарицаютъ; Тебе дѣвственніи полцы своего дѣвства образъ проповѣдуютъ; Тебе вси святыхъ души преславную Царицу небесъ нарицаютъ; Тебе по всей вселеннѣй святая Церковь всѣхъ вѣрныхъ христіанъ исповѣдуетъ Матерь Божію и почитаетъ истиннаго Царя Небеснаго Богоизбранную Отроковицу; Ты Ангеловъ Госпоже и всѣхъ святыхъ слава; Ты райская отверстая дверь; Ты лѣствице царствія небеснаго; Ты Царя славы прекрасный чертоже; Ты неистлѣнный ковчеже благодати; Ты бездна щедротъ; Ты прибѣжище грѣшныхъ; Ты, благословенная Мати Спасителя Христа; Ты, ради освобожденія плѣненнаго человѣка, Бога воспріяла еси во чрево отъ Духа Святаго и Невмѣстимаго вмѣстила еси; Тобою попранъ бысть адскій врагъ и отверзошася вѣрнымъ двери царствія небеснаго; Ты одесную Бога стоиши; Ты Его умоляеши за насъ, Приснодѣво Маріе, Иже будетъ судити живыхъ и мертвыхъ; Тя убо желаемъ всегда быти нашу Заступницу къ возлюбленному Сыну Твоему и Богу, Иже честною кровію насъ искупилъ есть, да воспріимемъ вѣчныя славы обѣтованіе. Спаси люди Твоя, о, Бладычице, и благослови достояніе Твое, яко да будемъ причастницы блаженнаго наслѣдія Сына Твоего, и упаси насъ, и возьми насъ даже до вѣка, на всякъ день. О, Прещедрая! хвалити и блажити Тя желаемъ сердцемъ и устнами. Сподоби, Премилосердная Мати, нынѣ и всегда безъ грѣха сохранитися намъ. Помилуй насъ, Заступнице, помилуй насъ, да будетъ милость Твоя съ нами, яко уповаемъ на Тя, соблюди насъ, Премилосердная, во вѣки вѣковъ.

Тебѣ подобаетъ хвала, Тебѣ подобаетъ слава, Тебѣ подобаетъ пѣніе нынѣ и присно, и во вѣки вѣковъ, аминь.

Псаломъ 4.

Егда призвахъ Тя, Госпоже, съ вѣрою и надеждою на Тя, услышала мя еси и отъ рыкающей поднебесной злобы, пріуготовившейся снѣсти мя, и отъ хищныхъ рукъ, ищущихъ души моея, милостію Твоею защитила и избавила мя еси, понеже блага милость Твоя на всѣхъ, призывающихъ имя Твое святое. Благословенна Ты въ женахъ, Госпоже, во вѣки и владычество Твое вознесеся во вѣкъ вѣка.

Псаломъ 5.

Глаголы моя внуши, Госпоже, и не отврати отъ мене матернее лице Твое, обрати плачъ мой въ радость и сѣтованіе мое въ веселіе, да падутъ предъ ногами моими врази мои, многомощными молитвами Твоими гордыя главы ихъ сокруши, да благословитъ Тя всякъ языкъ и имя Твое исповѣсть всяка плоть. Благословенна еси, о, великаго Царя небеснаго Дщи: Ты еси вѣнецъ всей святыни, Ты еси слава горнему и дольнему Іерусалиму; благословящіи Тя избыточествуютъ въ трудѣхъ своихъ, благословящіи Тя будутъ благословенны, клянущіи Тя проклянутся; да не умалится отъ дому рабовъ Твоихъ вина и елея изобиліе. Благословляемъ Бога, создавшаго Тя, благословени родители Твои, рождшіи Тя; благословенна еси, Госпоже, на небеси и на земли, хвальна и препрославленна во вѣки вѣковъ.

Псаломъ 6.

Госпоже, да не яростію Своею обличитъ насъ, грѣшныхъ, правосудный Господь, ниже гнѣвомъ Его накажемся; Ты, Заступнице наша, да попечешися о насъ и ради святаго имени Твоего отъ вратъ адовыхъ и отъ чрева мрачныя бездны Твоими молитвами избави насъ, да повѣдаемъ во вѣки чудеса Твоя, понеже не мертвіи, ниже сушіи во адѣ восхвалятъ Тя, но мы, живіи, благодатію Твоею благословимъ Тя.

Пѣснь вмѣсто славы.

Слава Тебѣ, Мати Божія, вѣрныхъ прибѣжище, избавленіе въ лютыхъ содержимыхъ, душѣ моей Божественное утѣшеніе. Всеокаянную душу мою, Благодатная, уязвленную стрѣляніи злобнаго ратника, вручаю всесильному предстательству Твоему, юже соблюдай, и покрывай, и спасай отъ бѣсовскихъ козней невредиму, да зову Ти: радуйся, Невѣсто Неневѣстная!

Псаломъ 7.

Госпоже моя, на Тя уповахъ; отъ враговъ избави душу мою, яко да во сміреніи моемъ благоугожду Тебѣ; свѣтлость лица Твоего да облистаетъ душу мою и воззрѣніе Твое на мя милостивное да освятитъ совѣсть мою, и принесу Тобою молитвы и моленія къ Вышнему.

Псаломъ 8.

Госпоже, Господь нашъ бысть Тобою Спаситель и братъ нашъ; яко огнь въ купинѣ и роса на руно, на Тя сниде предвѣчное Божіе Слово, Духу Святому нашедшу, осѣни Тя сила Вышняго; благословенъ зачатый въ Тебѣ плодъ чрева Твоего, благословенно рождество Твое дѣвственное, благословенна чистота плоти Твоея, благословенны щедроты сердца Твоего: слава Тебѣ, всѣхъ вѣрныхъ усердная Заступнице.

Пѣснь вмѣсто славы.

Радуйся, Прещедрая милости Мати, спаси благодатію Твоею всѣхъ, призывающихъ Тя во истинѣ, въ уединеніи сущимъ буди утѣшеніемъ, во искушеніяхъ— прибѣжищемъ: помощи Твоей вручаю душу и тѣло мое, управи, научи, что ми подобаетъ творити, да спасуся.

По 1-й каѳисмѣ тропари, гл. 1:

Просвѣти, Благая, омраченную душу мою, и нечувствіе прожени, и научи мя творити волю Сына Твоего, яко да оставленіе многихъ моихъ грѣховъ получу молитвами Твоими.

Подаждь ми, Дѣво умиленіе, слезъ изліяніе обильное, источившая намъ бездну щедротъ, изсушающую золъ наводненіе и страстей токи, едина Пречистая.

Приближается Судія, при дверехъ конецъ, бодрствуй душе, и изъ глубины сердца возопій Матери Бога нашего: избави мя страшныхъ мукъ, и въ мѣстѣ свѣтлѣмъ всели Твоимъ, Владычице, предстательствомъ.

Молитва.

Владычице Богородице, Человѣколюбивая Госпоже моя, Ты вѣси помышленія и дѣла моя и немощь моего естества. Тебѣ душу мою, юже осквернихъ грѣхми и непотребными помыслы, представляю. Ты бо, Владычице, вѣси гной моихъ язвъ, тѣлесныхъ и душевныхъ, Ты же и исцѣленіе оть нихъ даруй, возливающи каплю Твоего человѣколюбія и милости. Призри убо, Владычице моя Богородице, милосердымъ Твоимъ окомъ на окаянную мою душу, одержимую тягостію грѣховною и готову сушу огню предану быти отъ Праведнаго Судіи. Но молитвами Твоими, Человѣколюбице, благопріятна сотвори Своего Сына и всѣхъ Бога, хотящаго мя обличити предъ Ангелы и человѣки за мои худыя помышленія и дѣла. Послушаетъ бо Тебе, яко Благъ и Человѣколюбецъ, о душѣ моей окаяннѣй молящуюся. О, прибѣжище вѣрныхъ, помилуй мя, валяющагося въ безднѣ грѣховнѣй, но приносящаго Ти воздыханіе отъ сокрушеннаго сердца, да Твоего ради заступленія сподоблюся прощенія многихъ моихъ грѣховъ. Тебе бо намъ прибѣжище положилъ есть Сынъ Твой Богъ. Ей, Господи, Господи, изволивый милосердія ради Твоего родитися отъ Чистыя Матере и Приснодѣвы Маріи, спасенія ради человѣческаго, пріими сію Ходатаицу о моемъ недостоинствѣ. Тоя ради помощи и заступленія припадаю къ Твоей безмѣрной благости и человѣколюбію, да получу прощеніе грѣховъ моихъ, ими же волею согрѣшихъ предъ Тобою, Господи. Яко Тебѣ подобаетъ всякая слава, честь, со Отцемъ и Святымъ Духомъ, нынѣ, и присно, и во вѣки вѣковъ. Аминь.

 

Hosted by uCoz