Каѳисма 2.

Псаломъ 9.

Исповѣмся Тебѣ, Госпоже, всѣмъ сердцемъ моимъ и повѣмъ въ людѣхъ вся чудеса Твоя, хвалу и славу Твою; по Господѣ Бозѣ Тебѣ подобаетъ слава и Тебѣ да вознесется сердечный гласъ хвалы; кающіися бо грѣшницы у Бога и въ Богѣ обрѣтаютъ спасеніе Тобою; воздохнутъ они смиреннѣ и Ты, сердобольная Мати, исцѣляеши сокрушеніе сердецъ ихъ, въ мирѣ и тишинѣ по трудѣхъ странствія своего, при Твоемъ утѣшительномъ предстательствѣ, почіютъ они о Господѣ.

Псаломъ 9.

На Госпожу Пречистую Дѣву Марію уповаю ради щедротъ и милости Ея: очи Ея на нищихъ призираютъ и руцѣ Ея къ сиротамъ и вдовицамъ простерты; взыщите Ю отъ юности вашея и прославитъ васъ предъ лицемъ Бога ходатайство Ея къ престолу Его, отыметъ множество нашихъ грѣховъ, милость и утѣшеніе небесное всегда Она намъ приноситъ. О, Приснодѣво Преблагословенная, простри къ намъ крѣпкую десницу Твою, со благоговѣніемъ ю лобызаемъ, и не отврати отъ насъ лице Твое.

Пѣснь вмѣсто славы.

Пресвятая Дѣво, Мати Христа Бога нашего, смиренно молюся ти: души моея страсти лютыя исцѣли и прощеніе даруй моимъ многимъ прегрѣшеніямъ, ихъже безумнѣ содѣяхъ азъ. Душу и тѣло осквернихъ окаянный, увы мнѣ, что сотворю въ часъ онъ, внегда грозніи Ангели душу мою разлучатъ отъ страстнаго моего тѣлесе? Тогда Помощница ми буди и предстательница теплѣйшая, Тя бо имамъ твердую и необоримую стѣну, рабъ Твой.

Псаломъ 11.

Спаси мя, Мати Премилостивая, источниче благостыни и бездна щедротъ; коль красны суть путіе Твоя и коль мирны стези Твоя! Въ Тебѣ сіяетъ небесная доброта чистоты, свѣтъ правды, и свѣтлости, и истины; паче солнечнаго свѣта одѣяна еси ризами позлащенными, преиспещренными, преукрашенными красотою чистѣйшихъ Твоихъ добродѣтелей; дванадесять пресвѣтлыхъ небесныхъ звѣздъ составляютъ вѣнецъ, иже на главѣ Твоей: слава Тебѣ, всѣхъ вѣрныхъ христіанъ усердная Заступнице.

Псаломъ 12.

Доколѣ, Госпоже, забудеши мя и не избавиши мя въ день скорби моея? доколѣ вознесется душевный врагъ мой на мя? Силою и властію Твоею сокруши его, буди мнѣ, немощнѣйшему, Госпоже, столпъ крѣпости и оружіе, сокрушающее врага, возвеличу Тя, Благодатную, сердцемъ и устами прославлю, яко непобѣдимую воеводу.

Псаломъ 13.

Рече безумный, адскій противникъ въ сердцѣ своемъ: пожену и постигну вѣрныхъ Христовыхъ и убіетъ ихъ рука моя. Востани, Госпоже, предвари его, запни ему и низложи вся злыя совѣты его. Твоему могуществу кто противу станетъ? Твоей власти кто воспротиворѣчитъ? Твою матернюю любовь къ вѣрнымъ кто пресѣчетъ? Адъ трепещетъ святѣйшаго имени Твоего, мертвыя востаютъ отъ силы Твоея; отъ единаго мановенія Твоего безчисленныя кровожадныя воинства погибаютъ; о, Приснодѣво Богородице! невмѣстимаго всемогущаго Бога во утробѣ Твоей вмѣстила и носила еси.

Пѣснь вмѣсто славы.

Радуйся, пространнѣйшій дворе и пресвѣтлѣйшая палато, Маріе, Мати Христа Бога нашего: спаси пѣвцы Твоя, яко да въ бурномъ океанѣ жизни сея всегда къ Тебѣ прибѣгаемъ.

Псаломъ 14.

Госпоже, кто обитаетъ въ жилищи Божіи, или кто вселится во святую горнюю Сіонскую гору, идѣже присѣщаетъ свѣтъ лица Божія? Той боголюбецъ, иже по Бозѣ все упованіе свое на Тя едину возлагаетъ; той боголюбецъ, иже во умѣ своемъ обноситъ всегда сладчайшее имя Твое; той боголюбецъ, иже воспѣваетъ чудеса и милости Твоя; той боголюбецъ, иже подражаетъ смиренію, кротости и цѣломудрію Твоему; той вселится въ преблаженное жилище Божіе, иже, о, Преблагословенная Приснодѣво Маріе, величитъ душею Господа и радуется духомъ о единомъ Богѣ Спасѣ своемъ. Потечемъ, грѣшницы, потечемъ по стезямъ Матери Божіей, держимся за стопы Ея крѣпко и не отступимъ молитвами отъ Нея, колѣнопреклоняяся предъ святымъ изображеніемъ лица Ея, возводя умъ на первообразное, дондеже обрящемъ милости Ея во благовременну помощь къ наслѣдію небеснаго обѣтованія.

Псаломъ 15.

Сохрани мя, Госпоже, яко изліяся на Тя неисчерпаемый токъ Божіей благодати, излей и на мя каплю ея; чрево бо Твое дѣвственное, утреба Твоя чистѣйшая Всевышняго Бога, возлюбленнаго Сына, отъ Духа Святаго роди; благословени пречистіи сосцы Твоя, ими же Спасителя Іисуса Христа питала еси. Исповѣдайте Ей хвалы, дѣвы цѣломудренныя, аще токмо обрѣли есте благодать и милость Ея, дадите великолѣпіе имени Ея и хвалите въ вѣкъ вѣка зачатіе и рождество Ея.

Псаломъ 16.

Услыши, Госпоже, правду мою и отжени отъ мене скорбь мою. Исповѣмся Тебѣ во гласѣ радованія и воскликновенія, егда изліется на мя милость Твоя; уподобитеся Ей въ боголюбіи и вы, святіи дѣвы Божіи, прославите Ю во гласѣ устъ и сердца вашего; сице бо Ея благодать воспріяша дѣвы мученицы и прочіи, плѣненніи любовію сладчайшаго Іисуса, воспріяша отъ Него нетлѣнные райскіе вѣнцы. Слава Тебѣ, Владычице, любящимъ Тя дѣвамъ неотъемлемое сокровище.

Пѣснь вмѣсто славы.

Радуйся, Мати Маріе, звѣздо присносіяющая, отъ Нея же солнце правды, Христосъ Богъ нашъ возсія, Его же свѣтлостію слѣпіи прозрѣша. Моли за насъ, грѣшныхъ рабовъ Твоихъ, и многомощными Твоими молитвами помози видѣти Тя, возвеличенную Госпожу Ангеловъ, и сподобитися съ ними славити Тя въ горнемъ Сіонѣ во вѣки вѣковъ, аминь.

По 2-й каѳисмѣ тропари, гл. 2.

Тебе, Богородице, съ вѣрою просимъ, бѣдъ многихъ и прегрѣшеній да избавимся, ибо инаго, Пречистая, скораго не имамы утѣшенія, развѣ Тебе благоутробныя, подающія всѣмъ спасеніе.

Едина Бога безъ истлѣнія рождшая, Тебѣ припадаемъ, Приснодѣво, со страхомъ и любовію взывающе: страстей и недуговъ лютыхъ избави ны.

Егда душа имать разлучитися отъ тѣлесе, тогда предстани ми, Богорадованная, и враговъ совѣты разруши, ищущихъ поглотити мя, яко да свободився Тобою князей тьмы, части избранныхъ сподоблюся молитвами Твоими.

Молитва.

Пречистая Владычице Богородице! вѣмъ, яко азъ сквернавъ и нечистъ, и недостоинъ есмь, и всякаго грѣха исполненъ есмь. Сего ради, яко повинный, со многимъ стыдомъ и со слезами вопію Ти, Владычице моя Богородице: помилуй мя и помози ми, и утѣши мя, недостойнаго раба Твоего (имя рекъ). Мати всякія утѣхи, Сына Твоего и Бога нашего молити не престай, яко грѣшная и окаянная моя душа сниде во глубину золъ. Азъ же, грѣшный и нечистый, помышляя о прежнихъ и нынѣшнихъ своихъ грѣсѣхъ, рѣхъ: нѣсть злобы никоея, еяже азъ, окаянный, не сотворихъ. Того ради ужасаюся и боюся Сына Твоего и Бога моего и праведнаго Его судища. Тѣмъ же съ сокрушеннымъ сердцемъ и со слезами вопію Ти: умилосердися. Владычице моя Богородице, помилуй мя, самовластнымъ умомъ преступившаго оправданія и повелѣнія Сына Твоего и Бога моего. Не остави мя погибнути въ моихъ грѣховныхъ сквернахъ и обычаяхъ, но посли на мя милости Твоя богатыя. Ты бо еси милосердія и милости Мати, не презри мя гибнущаго, но обрати мя и исторгни мя изъ тины грѣховныя, якоже древле Сынъ Твой исторгъ блудницу, блуднаго сына и мытаря. Даруй ми источникъ слезъ и омый скверну грѣховъ моихъ. Не отрини мене, не гнушайся мене, сквернаго, но водами щедротъ Твоихъ угаси изгорѣвшую напастьми душу мою, избави мя пламени бѣсовскаго обдержанія и отъ лаянія ихъ исхити мя, да вижду Тя отгоняющую отъ мене во время отшествія моего темноличныхъ бѣсовъ, предавши мя благимъ и свѣтлоличнымъ ликомъ святыхъ Ангеловъ. Ты бо еси, Богородице, грѣшникомъ спасеніе, отчаяннымъ заступленіе и обращеніе, печальнымъ утѣхо. Тебе бо Сынъ Твой, Богъ нашъ, дарова Ходатаицу намъ, призывающимъ Тя отъ всего сердца. Спаси мя, Пресвятая Богородице, недостойнаго раба, ради милости Сына Твоего и Бога нашего, аминь.

 

Hosted by uCoz