Каѳисма 4.

Псаломъ 24.

Къ Тебѣ, Госпоже, воздвигохъ душу мою, яко да на страшнѣмъ судѣ Божіемъ Твоими молитвами не постыжуся, ниже да посмѣются о мнѣ врази мои и поднебесной злобы лукавнующіи полки да не преткнутъ стопы моя, ниже да не превзыдутъ мене сѣти смертныя; съ кротостію притецы къ душѣ моей, путеводительница буди ко отечеству небесному и къ блаженному собору избранныхъ Божіихъ сопричти мя.

Псаломъ 25.

Суди мя, Госпоже, яко азъ незлобою моею ходихъ, уповая на Тя не изнемогу. Воспламени сердце мое огнемъ любви Твоея и поясомъ чистоты Твоея востягни утробу мою, милость и щедроты Твоя предъ очима моима суть; наслаждуся во гласѣ хвалы Твоея, Госпоже; возлюбихъ святолѣпное лице Твое, покланяюся ему и почитаю святое владычество Твое. Исповѣдайтеся имени Ея, яко свято есть, и Повѣдите въ вѣкъ чудеса Ея.

Псаломъ 26.

Госпоже, небесное сіяніе лица Твоего да будетъ просвѣщеніе мое и свѣтлость благодати Твоея да возблистаетъ во умѣ моемъ; вознеси главу мою на враги моя, яко азъ преславное имя Твое воспою, и не отврати лица Твоего отъ мене; красоту и доброту Твою возжела душа моя и Тя во дни и въ нощи ищетъ сердце мое, Царице небесная, не отстави благодати и милости Твоея отъ мене и прославлю во языцѣхъ славу Твою, еюже прослави Тя Отецъ, Сынъ и Святый Духъ.

Пѣснь вмѣсто славы.

Преукрашенная и во вѣки благословенная всѣми Приснодѣво Богородице Маріе, невмѣстимаго Бога храме, Духа Святаго пріятелище, двере небеснаго царствія, всея вселенныя Мати, приклони ухо Твое къ недостойному моему моленію и буди мнѣ, грѣшному, милостивая попечительница и во всемъ помощница.

Псаломъ 27.

Къ Тебѣ, Госпоже, воззову и услыши мя, и во гласѣ хвалы Твоея возвеселиши мя. Помилуй мя въ день тѣсноты моея и свѣтомъ истины Твоея озари мя; самъ Господь во утѣшеніе наше Тя далъ есть и Ты крѣпость моя и хвала о Господѣ; почерпну убо воду благодати Твоея съ веселіемъ и испію отъ источника милости, и не вжажду во вѣки.

Псаломъ 28.

Принесите Госпожѣ нашей, сынове Божіи, принесите Госпожѣ нашей славу и хвалу. Даждь силу рабомъ Твоимъ, Мати пресвятая, и благословеніе славящимъ и хвалящимъ Тя. Услыши сердечное воздыханіе взирающихъ къ Тебѣ и не презри молитвы призывающихъ Тя; да будетъ рука Твоя распростерта и готова къ вспоможенію намъ и ухо Твое слышащее горестный и утомленный гласъ нашъ, Ты бо еси едина наша Матерь сердобольная.

Псаломъ 29.

Вознесу Тя, Госпоже, яко Ты еси прекрасное жилище Святаго Бога; вознесу Тя, Госпоже, яко воспріяла еси мя въ милость Твою и отъ душевнаго врага, противника моего, избавила мя еси: не отвратися и до конца множества ради грѣховъ моихъ, оживотвори духъ мой и окаменѣлое сердце мое умягчи въ покаяніе, яко да и азъ принесу Тебѣ жертву славы и хвалы. Радуйтеся, небеса, и веселися, земля, понеже утѣшаетъ Мати Марія вѣрныхъ рабовъ Своихъ и нищихъ духомъ милуетъ и благоволитъ о нихъ.

Пѣснь вмѣсто славы.

Радуйся, небесъ радосте! Радуйся и земли истинное веселіе, Маріе, Мати Христа Бога нашего! Ты умы любящихъ Тя любезно просвѣщаеши и вѣрныя Твоя пѣвцы со тщаніемъ приводиши къ сладости райскихъ обителей; къ Тебѣ, къ Тебѣ, Госпоже, обращаю лице мое, на Тя взираютъ очи сердца моего, на Тя уповаетъ душа моя; помилуй мя, Владычице, приведи къ отечеству любви вѣчныя.

Псаломъ 30.

На Тя, Госпоже, уповахъ, и не постыжуся во вѣкъ: благодатію Твоею пріими мя и воззрѣніемъ матернимъ утѣши мя; Ты еси крѣпость моя, и прибѣжище мое, и утѣшеніе мое, и покровъ мой, и надеждо моя непостыдная; въ руцѣ Твоего матерняго заступленія вручаю убогую мою душу, весь животъ мой, послѣдній день, конечную минуту дыханія моего и ужасное прехожденіе воздушныхъ мытарствъ.

Псаломъ 31.

Блажени, ихже сердца любятъ Тя, преблагословенная Приснодѣво; Воплощимбося изъ Тебе грѣхи ихъ милостивно очистятся и беззаконія ихъ покрыются, отъ плода бо святыя и пречистыя утробы Твоея изліяся на всѣхъ кающихся грѣшниковъ благоутробіе Божіе; и Ты, Владычице, прямая еси стезя къ царству небесному, блудящихъ въ мрачной нощи грѣховной просвѣщаеши и уклоняющихся въ законопреступныя дебри милосердно на путь истинный наставляеши: слава Тебѣ, всѣхъ вѣрующихъ скорая помощнице и заступнице.

Пѣснь вмѣсто славы.

Радуйся, Приснодѣво Богородице Маріе, нетлѣнный ковчеже, отъ потопа грѣховнаго весь родъ человѣческій спасшій. Радуйся, всѣхъ къ Тебѣ притекающихъ надежное и безопасное прибѣжище. О, всеблагодатная, всепрекрасная, всесладчайшая, всеблагословенная, помяни насъ, грѣшныхъ, у престола владычества Господня, Ему же Ты во славѣ предстоиши и насъ призираеши, аминь.

По 4-й каѳисмѣ тропари, гл. 4.

Въ мори мя плавающа, на пути шествующа, въ нощи спяща соблюди, бдящу просвѣти умъ мой, Госпоже, и настави творити волю Господню: яко да обрящу въ день судный въ житіи содѣянныхъ ми разрѣшеніе, прибѣгая въ кровъ Твой, Благословенная.

Не вниди со мною въ судъ Христе, азъ бо вѣмъ моя осуждающыя мя грѣхи, и Тебѣ взываю: молитвами Рождшія Тя помилуй мене смиреннаго и недостойнаго, яко разбойника и блудницу, мытаря и блуднаго, Человѣколюбче, не бо праведныхъ пришелъ еси спасти, но паче грѣшныя.

Даровъ Твоихъ честныхъ наслаждающеся, не умолчимъ пѣти, Богородице, милости Твоя всегда раби Твои, зовуще и глаголюще: Пресвятая Дѣво, всѣхъ насъ изми отъ козней вражіихъ и нуждъ и всякаго прещенія: Ты бо еси наше заступленіе.

Молитва.

Владычице, преблагословенная Защитнице рода человѣческаго, прибѣжище и спасеніе притекающихъ къ Тебѣ! вѣмъ, воистину вѣмъ, яко зѣло согрѣшихъ и прогнѣвахъ, премилостивая Госпоже, рожденнаго по плоти отъ Тебе Сына Божія; но имамъ многіе образы прежде мене прогнѣвавшихъ Его благоутробіе: мытари, блудницы и прочіе грѣшники, имже дадеся прощеніе грѣховъ покаянія ихъ ради и исповѣданія. Тыя убо образы помилованныхъ очесамъ грѣшныя моея души представляя и на толикое Божіе милосердіе, оныхъ пріемшее, взирая, дерзнухъ и азъ, грѣшный, прибѣгнути съ покаяніемъ къ Твоему благоутробному, сильному и непрестанному ходатайству. О, Всемилостивая Владычице! да подаси ми руку помощи и испросиши у Сына Твоего и Бога матерними и святѣйшими Твоими молитвами тяжкимъ моимъ грѣхомъ прощеніе. Вѣрую и исповѣдую, яко Той, Его же родила еси, Сынъ Твой, есть воистину Христосъ, Сынъ Бога живаго, Судія живыхъ и мертвыхъ, воздаяй комуждо по дѣломъ его; вѣрую же паки и исповѣдую Тебе быти истинную Богородицу, милосердія источникъ, утѣшеніе плачущихъ, взысканіе погибшихъ, сильную и непрестанную къ Нему ходатаицу, зѣло любящую родъ христіанскій, и споручницу покаянія. Воистину бо нѣсть человѣкомъ иныя помощи и покрова, развѣ Тебе, о Госпоже премилостивая! и никтоже, уповая на Тя, постыдѣся когда и, Тобою умоляя Того, никтоже оставленъ бысть. Того ради молю Твою неисчетную благость; отверзи двери милосердія Твоего мнѣ, заблуждающему и падшему въ тименія глубины; не возгнушайся мене сквернаго, не презри грѣшнаго моленія моего, не остави мене, окаяннаго, егоже во погибель злобный врагъ похити; но умоли всемощными и святѣйшими Твоими молитвами, о, милосердая! рожденнаго отъ Тебе милосердаго Бога, да проститъ великія моя грѣхи и избавитъ мя отъ пагубы моея, яко да и азъ со всѣми получившими прощеніе воспою и прославлю безмѣрное милосердіе Божіе и Твое непостыдное о мнѣ заступленіе въ жизни сей и въ некончаемомъ вѣцѣ. Аминь.

 

Hosted by uCoz