Каѳисма 6.

Псаломъ 37.

Госпоже, да не яростію и правосудіемъ Своимъ обличитъ насъ Господь въ беззаконіяхъ нашихъ. Ты, всемилостивая Предстательнице, исходатайствуй у Него прощеніе намъ, безотвѣтнымъ въ онѣхъ. Ты бо еси непостыдная надеждо наша и упованіе неложное; нѣсть мира въ костѣхъ нашихъ отъ лица грѣхъ нашихъ, но Преблагословеннымъ плодомъ чрева Твоего примирихомся съ Богомъ, благодать Его и Твоя милости одесную насъ.

Псаломъ 38.

Рѣхъ, сохраню спасителъныя пути возлюбленнаго Сына Твоего, Царице Небесная, и благодать Христова будетъ мнѣ подана, но духъ мой бодръ, плоть же немощна; помилуй мя отъ небеси и отъ высоты славы Твоея, Помощнице моя, и внегда подвижатися ногамъ моимъ отъ пути праваго, не попусти и сохрани ихъ, да не поползнутся и не преткнутся о камень злыхъ страстей, и да не порадуются о мнѣ душевніи врази мои! Услыши молитву мою, Госпоже, и не презри убогаго моленія моего.

Псаломъ 39.

Терпя потерпѣхъ благодать Твою, Госпоже, и сотворила еси мнѣ по множеству милости Твоея: услышала еси молитвы моя и извела еси мя отъ рова грѣхолюбивыхъ страстей и отъ ямы адскаго врага. Дивны и неизслѣдимы суть Твоя щедроты; да возрадуются и возвеселятся о Тебѣ вси любящіи Тя, ненавидящія же имя Твое снидутъ во адъ; благословенна и препрославленна Ты, Владычице, во вѣки вѣковъ.

Пѣснь вмѣсто славы.

Радуйся, предражайшій небесный Маргарите, егоже духовныя красоты и свѣтлости никакая тьма грѣховная обступити возможе; азъ же, грѣшникъ, знаю моя беззаконія и, повергаяся смиренно предъ стопы Твоя, моленіемъ молю, да не презриши мя, о, Надеждо моя преблагая, но великое окаянство мое воздвигни изъ глубины грѣховныя, да не погибну, яко неключимый рабъ въ будущемъ вѣцѣ.

Псаломъ 40.

Блаженна и преблаженна Ты Богородице Маріе, разумѣваеши бо на нищихъ духомъ и убогихъ сердцемъ. Во исповѣдуемыхъ предъ Богомъ и предъ Тобою немощехъ ихъ дѣйствуетъ Божія всемогущая сила и Твое матернее ходатайство. Слава Тебѣ Владычице, безпомощныхъ помоще, нищихъ и убогихъ богатство неотъемлемое.

Псаломъ 41.

Имже образомъ желаетъ елень на источники водныя, сице къ святой любви Твоей, Царице небесная, прибѣгаетъ жаждущая душа моя; Ты еси жизнь жизни моея и питательница бѣдныя плоти моея; Ты млекомъ питала еси Спасителя души моея, Сама же питалася еси нетлѣнною пищею божественнаго ученія Его. О, Свѣте, небеснымъ свѣтомъ осіянный! просвѣти, молю Тя, внутреннюю мою тьму, да умъ мой и желаніе мое воскрылятся при свѣтѣ Твоемъ къ горнему Сіону.

Псаломъ 42.

Суди мя, Госпоже, и разсуди прю мою съ плотію моею, прю съ міромъ прелестнымъ, прю съ діаволомъ—зміемъ лукавымъ, съ аспидомъ смертоноснымъ, да избавитъ мя отъ сихъ тріехъ ужасныхъ враговъ единая помощь Твоя; сокруши, Владычице, гордыя главы ихъ, истощи силы ихъ, и укрѣпи мя противустати имъ; десница Твоя въ крѣпости, держиши бо ею Содержащаго вся. Да воскреснетъ Господь во мнѣ благодатію Своею, за Твоя матернія молитвы, и расточатся врази моя.

Пѣснь вмѣсто славы.

Радуйся, яко даръ пріяла еси, яко Мати Божія, всѣхъ христіанъ недуги исцѣляти, и отъ бѣдъ избавляти, и грѣхи отпущати, и отъ плѣненія спасати, и отъ всякія нужды; не презри и насъ, Госпоже, вѣси бо, ихже требуемъ, — здравія тѣлесемъ и душамъ спасенія.

Псаломъ 43.

Владычице! Отцы наши возвѣстиша намъ и сами нынѣ ушима нашима слышимъ и очима видимъ, коль неизслѣдовани суть щедроты Твоя, и коль предивны чудеса Твоя, и коль неисчетны милости Твоя: востокъ и западъ, югъ и сѣверъ озарени суть ими; повсюду небесныя благостыни Ея уготованы хвалящимъ Ю, хвалящіи бо святѣйшее имя Ея возвеличатся отъ Бога.

Псаломъ 44.

Отрыгну сердце мое слово благо Госпожѣ Приснодѣвѣ Маріи: яко изъ устъ Ея сладкодышущихъ исходитъ небесная сладость, яко святѣйшимъ плодомъ чрева Ея грѣхи мои очищени суть, яко непорочнымъ дѣвствомъ Ея блаженное безсмертіе душѣ моей подадеся, яко рождествомъ Ея избавленъ есмь отъ адскаго плѣна и въ вѣчное небесное отечество возведенъ.

Псаломъ 45.

Владычице! Ты еси прибѣжище наше во всякихъ нуждахъ нашихъ, Ты крѣпость и сила, сокрушающая всѣхъ враговъ моихъ; благостыни Твоея преисполнена земля, проходитъ даже до преисподнихъ, отъ исполненія благодати Твоея бывшіи во адѣ, веселящеся, свободишася отъ него чрезъ преславное дѣвственное Твое рождество и человѣцы смертніи сообщницы содѣлашася безплотнымъ Ангеломъ.

Пѣснь вмѣсто славы.

Радуйся, преблагословенная Приснодѣво Маріе, Мати Христа Бога нашего; Ты превыше силъ небесныхъ возвеличена и одесную Бога въ ризахъ позлащенныхъ и преиспещренныхъ стоиши; къ Тебѣ вопію изъ плачевной юдоли міра сего: покрый мя кровомъ крилу Твоею, даждь мнѣ благодать скончатися во благочестивой вѣрѣ и по преселеніи изъ сея жизни сподоби узрѣти благословенный плодъ чрева Твоего — сладчайшаго Іисуса Христа, Спасителя моего.

По 6-й каѳисмѣ тропари, гл. 6.

Изнемогаетъ мой нынѣ умъ, впадъ во глубины противныхъ помышленій, и нѣсть ми ослабленія: услыши мя искушаема и даруй ми умиреніе, яко благая, да не буду снѣдь лукаваго, Маріе благословенная.

Судію міра милостива сотвори ми, Дѣво; никтоже бо якоже Ты можеши ходатайствовати, Матерь сущи Владыки всѣхъ Бога. Того убо прилѣжно моли о мнѣ, едина чистая.

Видимо предъ иконою Твоею предстоя, невидимо Тебѣ живущей на небеси мню предстояти, Мати живота, и со благоговѣніемъ молюся враговъ видимыхъ и невидимыхъ мя избави, Владычице.

Молитва.

Нескверная, неблазная, нетлѣнная, пречистая, неневѣстная Богоневѣсто, Богородице Маріе, Приснодѣво, Госпоже міра и надеждо моя! Призри на мя, грѣшнаго, въ часъ сей и Егоже изъ чистыхъ кровей Твоихъ неискусомужно родила еси, Господа Іисуса Христа, милостива мнѣ содѣлай матерними Твоими молитвами; Того зрѣвшая осужденна и оружіемъ печали въ сердцѣ уязвившися, уязви душу мою Божественною любовію; Того во узахъ и поруганіяхъ горцѣ оплакавшая, слезы сокрушенія мнѣ даруй; при вольномъ Того веденіи на смерть душею тяжцѣ поболѣвшая, болѣзней мя свободи, да Тя славлю, достойно славимую во вся вѣки. Аминь.

 

Hosted by uCoz