Каѳисма 8.

Псаломъ 55.

Помилуй мя, Госпоже, яко попраша мя адстіи врази мои, весь день помышленіе ихъ о мнѣ на зло, противу ихъ возстави ярость и гнѣвъ Твой, да разумѣвая разумѣю помощь мышцы Твоея, возвеличу милость Твою на мнѣ и благоугожду предъ Господемъ, благоугожду и предъ Тобою во свѣтѣ живыхъ.

Псаломъ 56.

Помилуй мя, Госпоже, помилуй мя, яко готово сердце мое взыскати Твою волю и подъ сѣнію крилъ Твоихъ опочити; руцѣ Твои составиша первую смирну благодати и персты Твои сотроша масти благовонныя, дыханія устъ Твоихъ паче всякаго ѳиміама; вся еси, Мати Божія, сладость небесная и ненасытимое желаніе, къ Тебѣ приверженъ есмь отъ чрева матере моея.

Псаломъ 57.

Аще воистину правду глаголете, правдою и истиною блажите небесную Царицу. Аще что прилежитъ къ славѣ и хвалѣ Спасителя Христа, аще что благоугодно Ему отъ насъ, то довлѣти будутъ пѣсни и пѣнія духовныя, возсылаемыя отъ насъ возлюбленнѣй Его Матери; Ею пророцы услаждахуся, Ею апостоли восхвалишася, Ею святители украсишася, Ею мученицы укрѣпишася? Ею иноцы наставлени быша, Ею постницы ангелоподобное житіе прохождаху, Ею дѣвствующіи лаврами чистоты облагахуся; дивенъ Богъ во всѣхъ святыхъ, но паче предивенъ въ Пресвятѣйшей Царицѣ царицъ, въ несквернѣй Невѣстѣ, Преблагословеннѣй Приснодѣвѣ Маріи.

Пѣснь вмѣсто сдавы.

Къ Тебѣ прибѣгаю, Пресвятая Богородице, многое множество сознаю моихъ прегрѣшеній и молюся Ти: посѣти немощствующую мою душу и испроси у возлюбленнаго Сына Твоего и Бога нашего дати ми прощеніе, едина Пречистая и благословенная; все упованіе мое на Тя возлагаю, премилосердная Мати Божія, сохрани мя подъ кровомъ Твоимъ.

Псаломъ 58.

Изми мя отъ враговъ моихъ, Госпоже Богородице, востани въ помощь мою, о, Царице милости; да исчезнетъ предъ очами воли моея темный мракъ грѣха и Ты, благодатная, просвѣти и озари внутреннее мое око; Ты, яко солнце, ризами позлащенными и преиспещренными одѣяна, сардисъ и топазіонъ въ вѣнцѣ Твоемъ, слава и богатство въ десницѣ Твоей, смирна, и ливанъ, и бальзамъ въ руцѣ Твоей, сапфиръ и измарагдъ на перстехъ Твоихъ.

Псаломъ 59.

Боже, отринулъ еси насъ грѣхъ ради нашихъ, ущедрилъ же еси насъ ради Приснодѣвы Маріи Богородицы; ходатайствуй о насъ, Мати Божія, яже Ангеломъ и человѣкомъ спасеніе родила еси; Ты печальнымъ утѣшеніе изливаеши и прискорбнымъ радость и веселіе: услади и насъ сладкотекущимъ гласомъ устъ Твоихъ, сладкотекущую благодать Твою вліяй въ сердца наша; возгремите небеса отъ высоты и дадите Ей хвалу, прослави Ю земля со всѣми живущими.

Псаломъ 60.

Услыши, Госпоже, молитву мою, и на твердомъ камени закона Божія постави помышленія моя, буди мнѣ столпъ крѣпчайшій, защищающій мя отъ безстуднаго лица адскаго врага; Ты едина прекраснѣйшая и яко красота облачная сіяеши, яко заря багряновидная востаеши, яко луна полная свѣтиши въ нощи и яко солнце блистаетъ пресвятѣйшій зракъ Твой; слава Тебѣ, царствующей на небеси, пріими въ царствіе небесное и насъ, земныхъ.

Пѣснь вмѣсто славы.

Пренепорочная Приснодѣво, Дщи Авраамова и Давидова, приклони ухо Твое къ убогой и смиреннѣй молитвѣ моей и не забуди людей Твоихъ, къ Тебѣ вопіемъ, помяни насъ Пресвятая Дѣво, Тебѣ вручаемъ спасеніе душъ нашихъ, буди ходатаица наша предъ святѣйшимъ лицемъ возлюбленнаго Сына Твоего, Господа нашего Іисуса Христа.

Псаломъ 61.

Не Богу ли повинется душа моя? отъ Того бо спасеніе мое; не Тебе ли, Владычице, возлюбити долженствуетъ сердце мое? чрезъ Тебе бо спасеніе мое, благословенный бо плодъ чрева Твоего есть Спаситель мой; чашу убо спасенія пріиму и имя Господне призову, призывая призову и Твое, Владычице, преславное имя, ибо Той Спасъ мой, Ты же Заступница моя.

Псаломъ 62.

Боже, Боже мой, съ возлюбленною Ти Матерію славлю Тя, дѣвственно бо Тя отъ Духа Святаго зачатъ и дѣвственно Тя роди. О, Госпоже! преблагословенна еси, предстоиши бо престолу Святыя Троицы и о насъ грѣшныхъ молишися, и мы въ кровѣ крилу Твоею возрадуемся и благословимъ Тя въ животѣ нашемъ, и о имени Твоемъ возслемъ къ Богу молитвы наши.

Псаломъ 63.

Услыши, Владычице, гласъ мой, внегда молитимися къ Тебѣ, избави душу мою, егда изыти ей отъ тѣлесе, отъ ужаса жестокаго адскаго врага. Коимъ дерзновеніемъ воззрю на праведнаго Судію и Бога моего? Ты, помощнице, стани одесную мене и испроси грѣхомъ моимъ прощеніе, и прежде, неже будутъ страшная сія испытанія о мнѣ, просвѣти очи души моея и прожени слѣпоту грѣховную; даждь мнѣ на Тя надежду имѣти въ жизни моей и во исходѣ моемъ.

Пѣснь вмѣсто славы.

Къ Тебѣ прибѣгаю, преславная Богородице, Юже Матерь милости и Царицу щедротъ вся православная церковь святыхъ познаетъ, не отрини мя, многогрѣшнаго, настави на путь истинный, покрый мя отъ сонма лукавнующихъ; Ты никогда никому, толкущему въ двери милосердія Твоего, не возбранила еси: Твоя милости ищущимъ ихъ Тобою, всемилостивая Мати, не отречени суть, рай утѣшенія Твоего всѣмъ отверстъ есть.

По 8-й каѳисмѣ тропари, гл. 8.

Богородице Приснодѣво, Ангеловъ славо и земнородныхъ украшеніе, испроси Тебѣ поющимъ грѣховъ всѣхъ прощеніе, буди милостива рабомъ Твоимъ, яко еси непостыдное прибѣжище человѣкъ и избавленіе отчаянныхъ, Преблагословенная.

Низложи Сильный, якоже рекла еси Владычице, сильныя со престолъ — смерть и адъ, и вознесе смиренныя — человѣковъ естество воплотивыйся изъ Тебе Избавитель душъ нашихъ.

Радуйся престоле огнезрачный всецаря Христа; радуйся едина Госпоже всея твари, Маріе Богопрославленная.

Молитва.

Пріими, о, Всеблагословенная и Всемощная Пречистая Госпоже, Владычице, Богородице Дѣво, сія молитвы, со слезами Тебѣ нынѣ приносимыя отъ насъ, недостойныхъ рабовъ Твоихъ, къ цѣльбоносному образу Твоему съ умиленіемъ притекающихъ, яко Тебѣ Самой ту сущей и слышащей моленія наша, и подающей съ вѣрою просящимъ по коемуждо прошенію исполненіе. Скорбящимъ бо скорби облегчаеши, немощнымъ здравіе даруеши, разслабленныхъ и недужныхъ исцѣляеши, отъ бѣсныхъ бѣсы прогоняеши, обидимыя отъ обидъ избавляеши, и насилуемыя спасаеши, грѣшныхъ кающихся прощаеши, прокаженныхъ очищаеши, и малыя дѣти милуеши, отъ узъ и темницъ свобождаеши, и всякія многоразличныя страсти врачуеши Ты, Госпоже Владычице Богородице; вся бо суть возможна ходатайствомъ Твоимъ къ Сыну Твоему, Христу Богу нашему. О, Всепѣтая Мати, Пресвятая Богородице Дѣво Маріе! не престай молитися о насъ, недостойныхъ рабѣхъ Твоихъ, славящихъ Тя и почитающихъ, и покланяющихся пречистому образу Твоему, и надежду имущихъ невозвратну и вѣру несумнѣнну къ Тебѣ. Приснодѣвѣ преславнѣй и непорочнѣй, нынѣ и присно и во вѣки вѣковъ. Аминь.

 

Hosted by uCoz