Каѳисма 10.

Псаломъ 70.

На Тя, Госпоже, уповахъ и не постыжуся во вѣкъ: милостію Твоею изми мя. Ради грѣховъ моихъ озлобленъ есмь зѣло, врази мои превзыдоша главу мою, подражниша мя и поругашамися весь день; вонми, всемилостивая Госпоже, яко скорблю: простри десницу Твою и помози погибающему; не закосни, не закосни молитвами Твоими, въ Тебѣ утвердихся оть утробы, отъ чрева матере моея Ты еси едина неложная моя покровительнице.

Псаломъ 71.

Боже, праведный судъ Твой возлюбленному Сыну Твоему, Царю царей, далъ еси, во еже судити людемъ Твоимъ въ правдѣ; ниспосылаеши милости Твоя на насъ и чрезъ небесную Царицу, возлюбленную Матерь Его, на руцѣхъ Ея зримъ Сына Божія, спасеніе и вѣчный животъ нашъ, небеса и земля исполнены славы Ея. О, препрославленная Владычице! Тобою услаждаются наши сердца; сотвори забыти намъ грѣхолюбивыя страсти суетныя жизни сея, влецы насъ узами благостыни Твоея и возбуди въ душахъ нашихъ жажду вѣчныхъ благъ, упой сладостію райскою сердца и мысли наша.

Пѣснь вмѣсто славы.

Владычице, не отрини раба Твоего, иже всю надежду свою по Бозѣ возлагаетъ на Тя; не возгнушайся мною, невоздержнымъ, и не презри бѣдствующаго и жесточайшеми болѣзнями мучимаго; но, яко сострадательная Матерь милосердаго Бога, помилуй раба Твоего, избави мя отъ осужденія въ моей совѣсти, утиши бурю злыхъ помысловъ, угаси пещь вожделѣній и пламень плоти укроти, и возжги во мнѣ любовь къ Сыну Твоему и Богу, и всѣ чувства мои охраняй, не попущай давать входа въ сердце мое ни единому безумному пожеланію. Умоли Господа, да подастъ мнѣ время покаянія, да не сразитъ мя безплоднымъ сѣкира смерти и да не буду вверженъ во огнь. Возжги угасшій свѣтильникъ души моей, разсѣй мракъ беззаконій моихъ и мглу похотей моихъ разгони Твоимъ ходатайствомъ, ибо много можетъ молитва Матери предъ Сыномъ, удобопреклоннымъ къ примиренію. Дай мнѣ свѣтъ покаянія и приведи мя ко днемъ сердечнаго сокрушенія.

Псаломъ 72.

Коль благь Господь правымъ сердцемъ, любящимъ и почитающимъ Пречистую Матерь Его: Ея молитвами благоугождаемъ Ему, Ея заступленіемъ отвращается отъ насъ, грѣшныхъ, гнѣвъ Божій, Ея помощію труды наши благословляются, Она за любящихъ и почитающихъ Ю предстанетъ ходатаицею на страшнѣмъ судѣ Божіемъ, удаляющіи же себе отъ Нея погибнутъ.

Псаломъ 73.

Госпоже, не отрини насъ до конца въ день печали, да исправится молитва наша предъ Тобою и гласы воздыхающихъ не презри; напряже лукъ свой противу насъ душевный врагь, но Ты, всемощная Царице, воздвигни руцѣ Твой на гордыню его въ конецъ и прожени его на мѣсто вѣчнаго осужденія.

Пѣснь вмѣсто славы.

Радуйся, Преблагословенная Приснодѣво Маріе, прибѣжище кающихся грѣшниковъ, питательнице убогихъ, спасеніе немощныхъ, утѣшеніе озлобленныхъ, даждь мнѣ благодать сію, да душа моя любовію внутреннею возлюбитъ Тя и языкъ мой днемъ и нощію возглаголетъ хвалы Твоея.

Псаломъ 74.

Исповѣмся Тебѣ, Госпоже, всѣмъ сердцемъ моимъ и о хвалѣ Твоей веселюся: пойте Ей живущіи на земли и хвалу Ея въ людехъ возвѣщайте, покланяйтеся Ей въ небесной красотѣ Ея, славите Ю въ неисповѣдимой добротѣ Ея, помяните во вѣки вѣковъ милости Ея, содержите во умѣ силы и чудеса Ея.

Псаломъ 75.

Вѣдомъ бысть во Іудеи Богь и въ новоблагодатномъ Израилѣ веліе имя Его; преславно и усладительно паче меда и сота и имя Преблагословенныя Приснодѣвы Маріи; щедроты Ея паче ароматъ; спасеніе и животъ, миръ и слава дѣвственнымъ Плодомъ Ея намъ туне даруются: прославите Ю небеса и земля, дадите Ей вся тварь хвалу и милость Ея вознесите благодарно.

Псаломъ 76.

Гласомъ моимъ къ Госпожѣ Маріи воззвахъ и внятъ ми милостію Своею, отъятъ отъ сердца моего уныніе и скорбь, кротостію Своею духъ оживотвори, слабость воли моея премѣни въ надежду благую и Своимъ смиреннымъ голубинымъ воззрѣніемъ вся внутренняя моя играти сотвори, помощію Своею изведе мя отъ бѣды смертныя и отъ руки врага и мѣстника злаго избави. Благодарю Тя, Бога и Спасителя моего, и возлюбленную Матерь Твою, мою скорую помощницу.

Пѣснь вмѣсто славы.

Радуйся, ходатаице къ Богу и человѣкомъ, Мати милости, неистощимо бо изливаеши на насъ, грѣшныхъ, дары благодати Твоея; Твоими молитвами, всемилостивая Владычице, Твоею помощію, Твоимъ предстательствомъ къ возлюбленному Сыну Твоему и Богу нашему язвы наши грѣховныя врачуются. Колико грѣшниковъ, изъ самой бездны паденія къ Тебѣ со слезами воззвавшихъ, Ты, помощнице, премилосердно исхитила еси и въ радость вѣчно блаженную внити сподобила. Слава Тебѣ, Премилосердная Мати!

По 10-й каѳисмѣ тропари, гл. 2.

Къ покрову Твоему, Богородице, притекаю, прося Твоего заступленія, не отрини мене, Пречистая, но благоутробно пріими зовущаго: Врача человѣкомъ рождшая, недугующую душу мою исцѣли.

Божественнымъ свѣтомъ тьму моего сердца далече, Благая, отжени, дающи ми токи слезъ на отмытіе сквернъ моихъ, имиже опечалихъ Преблагаго Господа: въ Тебѣ бо ми единѣй утѣшеніе.

Житіе мое, Владычице, многихъ искушеній исполнено отъ многихъ золъ моихъ, но Ты сихъ всѣхъ мя избави, и содѣлай непреткновенно, да вѣрою славлю Твое божественное Имя.

Молитва.

О, Пресвятая Госпоже, Дѣво Богородице, высшая Херувимовъ и Серафимовъ и Святѣйшая всѣхъ Святыхъ. Къ Тебѣ припадаю и усердно молюся, Преблагословенная рода вашего Заступница, въ странствіи семъ земномъ, многоскорбномъ и многомятежномъ, не лиши мене Твоего заступленія и покрова державнаго. Спаси и защити мя, Владычице, отъ разженныхъ стрѣлъ лукаваго врага спасенія нашего. Укрѣпи немощную волю мою въ дѣланіи заповѣдей Христовыхъ, умягчи окаменѣлое сердце мое любовію къ Богу и ближнимъ моимъ, даруй ми сокрушеніе сердечное и покаяніе истинное, да, очищся отъ скверны грѣховныя, возмогу принести Творцу благоугодные Ему плоды добрыхъ дѣлъ и сподобитися мирныя христіанскія кончины и отвѣта праваго на страшнѣмъ и нелицепріятнѣмъ судѣ Его. Ей, Госпоже всемилостивая, въ часъ грозный смертный наипаче яви мнѣ Твое многомощное заступленіе, ускори тогда на помощь мнѣ, безпомощному, и державною рукою Твоею исхити мя изъ власти лютаго міродержца: воистину бо много можеть молитва Твоя предъ лицемъ Господа и ничтоже невозможно ходатайству Твоему, аще токмо восхощеши. Тѣмже, на святый образъ Твой умиленно взирая и предъ Нимъ, яко живѣй Ти съ нами сущей, покланяяся съ упованіемъ благимъ, самъ себе и весь животъ мой Тебѣ по Бозѣ молитвенно предаю и Тя величаю съ рождшимся отъ Тебе Спасителемъ нашимъ, Господомъ Іисусомъ Христомъ, Емуже со безначальнымъ Его Отцемъ и Пресвятымъ Духомъ подобаетъ всякая слава, честь и поклоненіе, нынѣ и присно, и во вѣки вѣковъ. Аминь.

 

Hosted by uCoz