Каѳисма 11.

Псаломъ 77.

Внемлите, людіе Божіи, закону Бога живаго, приклоните ухо ваше во глаголы Спасителя Христа, не забудите милости и щедротъ и возлюбленныя Его Матери, Преблагословенныя Приснодѣвы Маріи, отверзите уста и сердца къ славословію Ея, возвѣщайте отъ рода въ родъ хвалы, силы и чудеса Ея, положите преславное имя Ея яко знаменіе или печать на сердцахъ вашихъ: якоже бо кокошъ, покрываетъ Она всѣхъ насъ воскриліемъ ризъ Своихъ.

Пѣснь вмѣсто славы.

Радуйся, Пресвятая Богородице Приснодѣво Маріе, отъ Тебе Царь царствующихъ и Господь господствующихъ плоть воспріяти изволи, Ты ходатаица между Богомъ и человѣки, небо и земля Твоимъ благословеннымъ плодомъ примирены; исходатайствуй у человѣколюбца Бога и моимъ согрѣшеніемъ прощеніе, яко да всѣмъ сердцемъ возлюблю и прославлю Сына Твоего, Господа нашего Іисуса Христа, и Тя, многомилостивую Матерь, нынѣ и во вѣки вѣковъ.

Псаломъ 78.

Госпоже! вольныя моя грѣхи и дуси нечистыя пріидоша во святый храмъ души моея и опустошиша его дерзностнѣ; увы! плача плачу со Іереміею и слезы мои на ланитѣхъ моихъ: како потемнѣ злато вѣры моея? како измѣнися сребро любви къ сладчайшему Іисусу? како разсыпашася стяжанія святыни христіанскія? увы! согрѣшихъ на небо и предъ Тобою, Владычице, заступи за мя, грѣшнаго, предъ Богомъ, присовокупи мя паки къ лику избранныхъ Его, одожди огорченному сердцу моему капли сладости небесныя благодати Твоея.

Псаломъ 79.

Пасый Израиля древняго, облагодатствовавый новаго въ возлюбленнѣмъ Твоемъ Сынѣ Спасителѣ Христѣ, премилосердный Отче небесный! сподоби насъ, грѣшныхъ, достойно ублажити пренепорочную Приснодѣву Марію, яко родившую божественнаго нашего Избавителя и Спасителя рода человѣческаго, яко во всю жизнь странствія сыновня на земли бывшую отъ Него неотлучною и всѣмъ Его страданіямъ и поношеніямъ мужеетвенною сподвижницею. О, возлюбленная и святѣйшая Мати Божія, сподоби насъ имѣти во устнахъ и въ сердцѣ пророческую Твою пѣснь сію: се бо отъ нынѣ ублажатъ Мя вси роди.

Псаломъ 80.

Радуйтеся Госпожѣ помощницѣ нашей, воскликните Ей въ веселіи сердца вашего: не оставитъ тщетно смиренное моленіе ваше, исполнитъ во благихъ вся прошенія ваша, токмо да подражаимъ смиренію, послушанію и кротости Ея: любитъ бо Она богобоязливая сердца, благодать Ея всегда пребываетъ съ таковыми: притецыте убо къ Ней вси со обѣщаніями святыми и неизреченныхъ благихъ Ея причаститеся. Слава Тебѣ, Владычице, неотъемлемое сокровище душъ нашихъ!

Пѣснь вмѣсто славы.

Радуйся, Пресвятая, паче всѣхъ женъ благословенная Богородице Маріе, по Единородномъ Твоемъ истинное всѣхъ вѣрныхъ спасеніе; сотвори, Владычице, да никакою любовію міра сего пристрастно обдержуся, но, презрѣвъ вся соблазны и похоти плотскія, въ Тріединомъ Богѣ и въ матернемъ благопокровительствѣ Твоемъ истинный покой душѣ и тѣлу моему имѣти всегда буду.

Псаломъ 81.

Богъ ста въ сонмѣ боговъ: отъ высочайшаго благоволенія Его яко райскій цвѣтъ, произыде Матерь Божія. Пріидите и припадите къ стопамъ Ея вси любящіи и почитающіи Ю: Она бо естъ источникъ вѣчныя жизни, туне напаяетъ жаждущихъ, и піющіи отъ сего не вжаждутся во вѣки.

Псаломъ 82.

Владычице, кто по Бозѣ подобенъ Тебѣ на небеси и на земли, яко честію и славою превосходитъ небожителей и земнородныхъ? Якоже отстоятъ небеса отъ земли, сице превознеслася еси надъ всѣми твореніями. Прильпе душа моя по тебѣ, Царице небесная, сотвори мя выну мысленно взирати на славу и величество Твое, яко да насыщуся ненасытимою благодатію Твоею.

Псаломъ 83.

Коль возлюбленна горняя селенія Твоя, препрославленная Госпоже Маріе, и коль любительна скинія вѣчнаго покоя Твоего! Обратися, обратися, горестная душе моя, всѣмъ твоимъ желаніемъ къ вѣчному оному твоему покою, вѣчная нерукотворенная храмина и тебѣ готова есть: Царица небесная ищетъ твоего спасенія, предстоя престолу Божію, выну молится о немъ и молитвы Ея паче ливана и кадила благовоннаго предъ возлюбленнаго Сына Ея, Спасителя нашего, восходятъ. Слава Тебѣ, Владычице, въ молитвахъ о насъ грѣшныхъ неусыпающей и въ предстательствахъ непреложное наше упованіе!

Псаломъ 84.

Благоволилъ еси, Господи, освятити утробу пренепорочныя Приснодѣвы Маріи Твоимъ спасительнымъ вочеловѣченіемъ; сія бо есть прекраснѣйшая во дщерѣхъ Іерусалимовыхъ и имя Ея во благословеніи. Преблагословенную Приснодѣву Марію пойте святіи Ангели и Архангели, славите Ю Силы и Господствія; вѣрніи, взыщите мудрость Ея; убозіи, богатитеся сокровищами щедротъ Ея; желающіи вѣчно спастися, призывайте Ю въ помощь въ простотѣ сердца вашего.

Пѣснь вмѣсто славы.

Радуйся, Царице небесная, Ты, яко багряновидная заря, сіяеши, яко луна полна и свѣтла, яко лучезарное солнце вся освѣщаеши; даждь мнѣ, грѣшному, молюся Ти, благодарныя Тебѣ молитвы возсылати всегда и ничтоже ино желати, тоимо еже бы очи Твои матерніи отъ мене не отвращени были, тіи очи, иже ангельскихъ очесъ чистѣйшіи суть, о, святѣйшая Приснодѣво Маріе!

По 11-й каѳисмѣ тропари, гл. 3.

Чудо веліе, како на рукахъ Ты носила еси, Дѣво Мати, дланію Своею вся содержащаго, и отъ сосцу Твоею питала еси млекомъ Пищедателя, Егоже прилѣжно моли Пресвятая, даровати намъ велію милость.

Покаянія стезю сокрушенную проходити мя укрѣпи, всесильне Спасе, дѣяніи же благими обогати убогую душу мою и отъ страстей тѣсноты въ широту безстрастія возведи ю, молитвами Богородицы, едине человѣколюбче.

Пристанище спасительное Тя имамы, Богородице, въ пучинѣ житейстѣй обуреваеміи. Ты убо спаси отъ всякія бѣды притекающихъ къ Твоей благости.

Молитва.

О, Всепѣтая Госпоже, Владычице, Дѣво Богородице Маріе! Ангельскихъ чиновъ веселіе и православныхъ христіанъ непрестанное радованіе! Смиренно припадая предъ Твоимъ неисповѣдимымъ величіемъ, умильно молю Тя, грѣшный и недостойный рабъ Твой: пріими отъ всея души возсылаемое Тебѣ отъ мене благодарственное сіе хваленіе и своею любовію, яко любвеобильнѣйшая Мати, согрѣй хладное сердце мое, умоли своимъ теплымъ предстательствомъ рождшагося отъ Тебе Господа Бога и Спаса нашего Іисуса Христа, да проститъ ми вся согрѣшенія моя и препояшетъ мя силою Своею свыше ко исполненію Божественныхъ заповѣдей Своихъ. Озари душу мою немерцающимъ Твоимъ свѣтомъ, иже да будетъ мнѣ, странствующему въ сей земной жизни, путеводителемъ къ горнему отечеству, Іерусалиму небесному. Да тако, по Бозѣ имѣя въ Тебѣ единѣй твердую надежду и упованіе спасенія моего, прославлю всесвятое и великолѣпое имя Отца, и Сына, и Святаго Духа всегда, нынѣ и въ безконечные вѣки. Аминь.

 

Hosted by uCoz