Каѳисма 12.

Псаломъ 85.

Приклони, Госпоже, ухо Твое и услыши мя; обрати матернее лице Твое и помилуй мя; сіяніе святыя красоты Твоея веселитъ душу мою, милости Твоя паче меда и сота, даяніе благодати Твоея просвѣщаетъ разумъ, источникъ благостыни Твоея напаяетъ жаждущихъ, Ангельскій зракъ лица Твоего отвлекаетъ отъ грѣха; видѣти, знати Тя и покланятися Тебѣ есть корень блаженнаго безсмертія и прославляти силы Твоя есть путь спасенія.

Псаломъ 86.

Основаніе духовной жизни есть любити Іисуса Христа всѣмъ сердцемъ и всею душею и рождшей Его по плоти возлюбленнѣй Его Матери, Пречистѣй Приснодѣвѣ Маріи покланятися благоговѣйно и чтити Ю, яко препрославленную Царицу небесную, честнѣйшую Херувимъ и славнѣйшую Серафимъ. Преславная глаголашася о Тебѣ, о, священнѣйшій храме и раю словесный; истинно уповающіи на Тя обрящутъ вся сокровища небесныя, а не призывающіи Тя въ жизни сей, жизни вѣчноблаженныя лишатся. О, премилосердная Владычице, сотвори, да живемъ благодатію Святаго Духа и сладчайшее имя Твое выну да будетъ въ сердцахъ нашихъ.

Псаломъ 87.

Гопоже Маріе, Ты едина скорая помощница во спасеніе мое; во дни и въ нощи взываю къ Тебѣ: призри на скорбь внутреннюю мою и утѣши небеснымъ Твоимъ посѣщеніемъ унылый духъ мой; умножишася бо беззаконія въ душѣ моей и нѣсть мира въ костехъ моихъ отъ лица грѣхъ моихъ, но молюся Ти, всемощная Владычице, помози мнѣ къ сопротивленію злѣй волѣ моей и утверди сердце мое на брань съ плотскими похотьми.

Пѣснь вмѣсто славы.

Радуйся, Пренепорочная, Пресвятѣй Троицѣ предстоящая; радуйся, благословенная въ женахъ, душею и тѣломъ Пречистая Маріе; молюся Ти, осіяй свѣтлостію лица Твоего внутренняя души моея, яко о Тебѣ возрадуется сердце мое, утѣшится духъ мой, яко да прилѣжно работаю Тебѣ и всею душею и всѣмъ сердцемъ возлюблю Тя во вѣки вѣковъ.

Псаломъ 88.

Милости Твоя, Госпоже, во вѣки воспою, мастію щедротъ Твоихъ умягчи ожесточенное мое сердце и елеемъ милости Твоея уврачуй грѣховныя раны; молюся Ти, Владычице, явися мнѣ веселымъ лицемъ при кончинѣ моей, и небесный зракъ Твой возвеселитъ исходъ души моея, избави мя отъ внезапныя смерти, да не порадуется о мнѣ душевный врагъ мой.

Пѣснь вмѣсто сдавы.

Пресвятая и преблагая Владычице Богородице, прибѣжище мое, жизнь, заступленіе, оружіе, похвало, надеждо, крѣпосте моя, даруй ми наслаждатися непостижимыми, неизреченными и неисповѣдимыми дарами Сына Твоего въ пренебесной жизни. Ты бо вся можеши, елика хощеши, яко Матерь Вышняго, и сего ради имаши дерзновеніе къ Нему. Да не лишенъ убо буду, Пречистая Владычице, исполненія упованія моего, но да сподоблюся получити оное, Богоневѣсто, упованіе всѣхъ, несказанно рождшая Господа нашего Іисуса Христа, истиннаго Бога и Владыку. Сподоби мя въ настоящемъ вѣцѣ неосужденно причащатися пресвятаго и пречистаго Тѣла и Крови Сына и Бога Твоего, въ будущемъ же сладчайшія вечери небесныя и веселія райскаго въ обителяхъ Святыхъ, идѣже всѣхъ веселящихся жилище. Сихъ благь сподобившеся, азъ, рабъ недостойный, буду во вѣки вѣковъ прославляти всечестное и великолѣпое имя Сына и Бога Твоего, Иже всѣхъ, отъ глубины души кающихся, пріемлетъ ради Твоего ходатайства и предстательства за всѣхъ грѣшниковъ. Тобою бо, всепѣтая и Преблагая Владычице, спасается все человѣческое естество.

Псаломъ 89.

Владычице! прибѣжище была еси намъ во всѣхъ нуждахъ нашихъ, и нынѣ изливаеши съ небесъ благодать Твою на вся благая прошенія наша; аще Ты милости Твоя удержиши грѣхъ ради нашихъ, обыдутъ насъ вся злая; не имамы иныя предстательницы къ Богу, токмо Тебе едину. Спаси насъ, Владычице, спаси, уповаемъ бо на Тя и несумнѣнно вѣруемъ, яко упованіе наше не постыдится никогда.

Псаломъ 90.

Живый въ помощи Матери Божіей подъ крѣпкимъ кровомъ Ея водворится; адскій противникъ врагь не повредитъ его и стрѣла его летящая не коснется ему, яко многомощная Владычица избавитъ его отъ сѣти ловящаго и крилами Своими покрыетъ его. Возопійте къ Ней вси въ бѣдахъ вашихъ и зловредная рана не приближится душамъ и тѣлесемъ вашимъ: явитъ бо вамъ всюду спасеніе Свое.

Пѣснь вмѣсто славы.

Радуйся, Пресвятая Богородице Маріе: предстани безпомощнымъ, помози малодушнымъ, утѣши плачущихъ, моли за люди, заступи за клиръ и всѣхъ православныхъ христіанъ пріими въ Свое заступленіе, да веселятся и торжествуютъ вси о преславномъ имени Твоемъ.

По 12-й каѳисмѣ тропари, гл. 4.

Матерь Бога нашего воспоимъ, яко Тою радость мірови даровася, Тою разрѣшеніе клятвы обрѣте человѣчество и избавляемся отъ всякихъ лютыхъ.

Господи, рождшія Тя предстательствомъ храни стадо Твое, еже кровію Твоею честною искупилъ еси, и отъ навѣтъ вражіихъ невредно соблюди, да славословимъ, щедре, Твое божественное снисхожденіе.

Осквернившуюся страстьми душу мою, Пречистая Богородительнице, Твоими молитвами очисти: Ты бо еси спасительное очищеніе съ вѣрою молящимся Тебѣ.

Молитва.

О, Всемилостивая Владычице, Царице Небесная, Пресвятая Богородице! Вѣмъ вся грѣхи моя и нечестія сердца моего, и како дерзну къ Тебѣ прибѣгати недостойный азъ и прошенія моя приносити; но вѣмъ и великія милости, и щедроты Твоя, яже на христіанскій родъ выну изливаещи: Ты бо еси грѣшниковъ споручница и помощь. Ты вѣси, Пречистая Мати, Дѣво Богородице, скорбь сердца моего и печаль души моея. Молюся убо Тебѣ усердно: вся скорбная, яже, по благой и святой волѣ Господа нашего Іисуса Христа, наидоша на мя, имиже вѣси судьбами, устрой о мнѣ во благое; аще ли же отъ врага души моея уязвленія сія содѣяшася, всесильною Твоею помощію сокруши его коварства и отъ нечестивыхъ прилогъ его избави душу мою. Тебѣ бо вся возможна суть, преисполненнѣй всякія милости и благостыни, яко Ты еси препрославленна во вѣки. Аминь.

 

Hosted by uCoz