Каѳисма 14.

Псаломъ 101.

Госпоже, услыши молитву мою и вопль мой сердечный къ Тебѣ да пріидетъ, да не отвратиши пресвятое лице Твое отъ мене, ниже возгнушаешися за нечистоту мою; не остави мя погибнути отъ злыхъ на мя совѣтовъ душевныхъ враговъ моихъ, и не попусти имъ съ лютымъ поношеніемъ посмѣятися надо мною; уповающіи на Тя не убоятся томящихъ озлобленій ихъ и восхваляющіи Тя молитвами Твоими избавятся отъ всѣхъ вражіихъ навѣтовъ: носиши бо на рукахъ Твоихъ Побѣдителя ада и смерти.

Псаломъ 102.

Благослови душе моя возлюбленную Матерь Господа нашего Іисуса Христа и вся внутренняя моя имя святое Ея; не забудемъ благотвореній Ея, ниже милостей и щедротъ Ея, благодатію Ея грѣхи заглаждаются и болѣзни врачуются. Благословите Ю вся силы небесъ, благословите Ю вси небожители и земнородніи.

Пѣснь вмѣсто славы.

Радуйся, благороднѣйшая Родительнице единороднаго Сына Божія, Приснодѣво Маріе, Яже всѣмъ милости нѣдро отверзаеши, яко отъ святыни Твоея пріемлемъ вси благодать. Пріими, Всеблагословенная, молитвы наша, отъ устенъ оскверненныхъ предъ Тобою проливаемыя, и моли за насъ возлюбленнаго Твоего Сына, да Его святѣйшимъ благоволеніемъ по жизни сей сподобимся узрѣти Тя во царствіи Божіи со Отцемъ, Сыномъ и Св. Духомъ во вся вѣки.

Псаломъ 103.

Благослови, душе моя, Господа, возвеличившагося зѣло, зѣло благослови и Приснодѣву Марію, въ небесную велелѣпоту облекшуюся; яко призрѣ Господь на смиреніе рабы Своея, и мы, христіанстіи роди, съ умиленіемъ сердца да ублажаемъ Ю; паче меда и сота сладчайша душѣ нашей память Ея и благоусладительна бесѣда о веліихъ чудесѣхъ Ея; Она естъ премилосердная Матерь, о насъ, яко о чадѣхъ, веселящаяся, и мы, яко птенцы, распростертыми крилами помощи Ея всегда защищаемыя, посредѣ самыя сѣни смертныя не убоимся зла, съ нами Владычица наша, съ нами милость и помощь Ея.

Пѣснь вмѣсто славы.

Сподоби мя всегда, во всѣ дни жизни моей, творить благоугодное человѣколюбивому Богу и, доколѣ пребываю въ семъ многоболѣзненномъ житіи, соблюдай мя, покрывай, сохраняй: буди со мною въ плаваніи моемъ, сопутствуй мнѣ, егда путешествую; храни мя, егда бодрствую; покрывай мя, егда сплю; и всѣ пути мои направляй ко благу. Во время же исхода моего изъ тѣла, буди ми предстательницею, боголюбивая Владычице, и нестерпимую оную болѣзнь смягчи, трудъ облегчи, тоску мою утоли и бѣдную мою душу приведи къ вѣчнымъ обителямъ, да не встрѣтитъ мя темная сила и да не увлечетъ во глубину ада. Даждь ми узрѣть Судію милосердаго, милостиво на мя взирающа; даждь избавитися, по Твоему ходатайству, Богоневѣстная Дѣво, отъ вѣчнаго пламени и наслаждатися веселіемъ райскимъ въ царствѣ небеснѣмъ.

Псаломъ 104.

Исповѣдайтеся въ теплыхъ молитвахъ Царицѣ нашей Богородицѣ и призывайте съ сердечнымъ чувствованіемъ святое имя Ея, пойте Ей вь пѣснехъ и пѣніихъ духовныхъ, преславно повѣдающе въ родъ и родъ древнія и новыя силы и чудеса Ея; хвалите и превозносите Ю дѣвы, дщери Сіонскія, понеже обручи васъ прекрасному небесному жениху, Царю славы, покланяйтеся съ благоговѣйнымъ страхомъ святолѣпному лицу Ея, спасеніе бо душамъ вашимъ вѣчное держитъ на рукахъ Своихъ и, иже достойно Ю почитаетъ, воспріиметъ отъ Господа праведную мзду.

Пѣснь вмѣсто славы.

Радуйся, неувядаемый райскій Цвѣте: молюся Ти, да облагоухаетъ мя ароматная воня Твоя, сердце мое Тя любитъ, чувства веселятся, весь умъ мой воспаряетъ.

По 14-й каѳисмѣ тропари, гл. 6.

Демонскими прилоги колеблему мнѣ, Дѣво, на камени утверди мя божественныхъ повелѣній Христовыхъ, да не потопитъ мене, Чистая, прегрѣшеній буря и помысловъ злыхъ треволненіе.

Страстей нахожденія въ ровъ погибели низвлачатъ изнемогающую душу мою, но умилосердися надо мною, рождшая Спаса всемилостиваго, и избави раба Твоего будущаго прещенія.

Воистинну паче ума Твоя, Чистая, дарованія, ихже сподобляеши рабы Твоя, теплѣ Тя славящыя и Твоему образу съ вѣрою покланяющыяся, чтущыя же отъ души и благоговѣйно лобызающыя, къ нимже сопричти и мене, аще и нѣсмь достоинъ Твоея милости.

Молитва.

Богорадованная Владычице, препрославленная Мати щедротъ и человѣколюбія, всемилостивая о всемъ мірѣ Ходатаице, прилежно раби твои, къ Твоему Божественному предстательству прибѣгающе и пречудному образу Твоему со умиленіемъ припадающе, молимся: молитву теплую Сыну Твоему и Богу нашему сотвори, о, Всепѣтая Царице и Владычице, да всякихъ болѣзней и печалей насъ Тебе ради избавитъ и отъ грѣховъ всякихъ свободитъ, царствія Своего небеснаго наслѣдники ны покажетъ; веліе бо и неизреченное, яко Мати, имаши дерзновеніе къ Нему и вся можеши, елика восхощеши, едина во вѣки Благая и Благословенная. Аминь.

 

Hosted by uCoz