Каѳисма 15.

Псаломъ 105.

Исповѣдайтеся Владычицѣ Богородицѣ, яко блага есть въ щедротахъ Своихъ; кто возглаголетъ силы Ея, слышаны сотворитъ вся хвалы Ея? Благопоспѣши, о, премилосердная Мати, обуреваемымъ намъ въ океанѣ суетнаго міра сего спасеніемъ Твоимъ: всѣмъ сердцемъ молимъ Тя и всею душею величаемъ Тя, услыши гласы воздыхающихъ къ Тебѣ, помози безпомощнымъ, утѣши плачущихъ, возвесели скорбящихъ, Ты бо еси живоносный милостей источникъ для всѣхъ, съ вѣрою и молитвами къ Тебѣ прибѣгающихъ; слава Тебѣ, непостыдная надеждо наша.

Пѣснь вмѣсто славы.

Пресвятая Владычице моя, Богородице, милосердія сущи источникъ, покрове, упованіе и прибѣжище христіанъ, Тебѣ, всесильнѣй предстательницѣ и споручницѣ покаянія и спасенія моего, азъ, грѣшный рабъ Твой, вручаю душу и тѣло мое, входъ и исходъ мой, вѣру и жительство мое, кончину и число дней моихъ, глаголы и помышленія моя, дѣла и начинанія моя. Ты же, милостивая Мати Божія, мною руководствуй, покрывай, соблюдай и спасай мя отъ всѣхъ бѣсовскихъ козней невредима, да немолчно, до послѣдняго издыханія моего взываю Ти: Радуйся, Невѣсто Неневѣстная.

Псаломъ 106.

Исповѣдайтеся Господеви, яко благъ; исповѣдайтеся и возлюбленнѣй Его Матери, яко велія милость Ея на насъ; наставляетъ бо насъ на путь истинныя мудрости, показуетъ мирныя стези небесной истины, научаетъ страху Господню и изъ любящаго Ю сердца изгоняетъ любовь къ міру, яже есть вражда на Бога; блажени мы, аще молитвы наши къ Ней благоугодны Ей; кости наши утучнятся отъ тука благодати Ея, насытятся алчущія души и жаждущія напоятся, изъ чрева бо Ея проистече живый и вѣчный источникъ спасенія нашего.

Пѣснь вмѣсто славы.

Радуйся, едемскій цвѣте, испущающій неизреченное благоуханіе; радуйся, пренепорочная чистото, юже возлюби Духъ Святый; радуйся, слава всѣхъ дѣвствующихъ о Господѣ; помози, Владычице, молимся Ти, и намъ сохранити душевную и тѣлесную чистоту: блажени бо чистіи сердцемъ, яко тіи Бога узрятъ.

Псаломъ 107.

Готово сердце мое, Госпоже, готово сердце мое хвалы Тебѣ пѣти; искати благодать Твою лучши есть паче злата и камене многоцѣнна, милости Господни на тѣхъ, иже Тя во истинѣ почитаютъ; прославляющіи Тя прославятся и далече будутъ отъ вѣчной погибели, призывающіи Тя въ напастехъ и искушеніяхъ охранятся простертіемъ крилъ скорыя помощи Твоея.

Псаломъ 108.

Госпоже, хвалы къ Тебѣ моея да не премолчиши и сіе изреченное Тебѣ псалмопѣніе пріяти да изволиши: призри на трудъ мой сей и сотвори его Тебѣ благоугоднымъ, соблюди мя невредима подъ защищеніемъ десницы Твоея и утѣши сокрушенную душу благостію и милостію возлюбленнаго Сына Твоего, истиннаго моего Спасителя, Господа и Бога.

Пѣснь вмѣсто славы.

О, преблагословенная Приснодѣво Маріе, возлюбленная Дщерь Отца небеснаго, молюся Ти: буди мнѣ, грѣшному, кормчая, дондеже въ бурномъ морѣ вѣка сего плаваю, а паче при кончинѣ жизни моея, благополучно да достигну пристанища небеснаго Іерусалима, идѣже Тя буду хвалити и блажити во вся вѣки вѣковъ, аминь.

По 15-й каѳисмѣ тропари, гл. 7.

Всещедраго Бога о насъ, Дѣво, умоли, избавитися душамъ нашымъ отъ всякаго вреда зміина.

Воздыхающа мя, Господи, пріими яко милостивъ, и помилуй мя яко мытаря, Матере Твоея ходатайствомъ.

Ко множеству милости Твоея нынѣ прибѣгаю, разрѣши вериги, Богородице, согрѣшеній моихъ.

Молитва.

О, Пресвятая Владычице Богородице, Небеснаго Царя Мати, наша же преблагая надеждо, предъизбранная Богоотроковице, ненадѣющимся надѣяніе, грѣшнымъ спасеніе, сирымъ пріятелище, нагимъ одѣяніе, скорбящимъ утѣшеніе и радость, обидимымъ покровительнице и всѣмъ сущимъ въ бѣдахъ и напастѣхъ вспоможеніе и заступленіе. О, всемилостивая Госпоже Дѣво Богородице, зриши мою бѣду, и скорбь, и напасть; помози ми, бѣдному и немощному, скверному и унылому, печальному, скорбному и ненадежному, и отъими отъ меня печаль сію, яко странну; обиду мою Ты вѣси, разрѣши ту, Всенепорочная, яко волиши и можеши; не даждь во отчаяніе впасти, яко не имамы иныя помощи, развѣ Сына Твоего, Превѣчнаго Младенца, и Тебе, Божія Мати. О, Владычице міра, о, Царице всея твари, о, Голубице Пресвятая, на Твой пречудный образъ съ Превѣчнымъ Младенцемъ взираю, со воздыханіемъ и сокрушеніемъ сердца преклоняю колѣна и главу до земли, призри благосердымъ окомъ, Всепѣтая Богородице и услыши, Преблагая, и не отрини, но благоволи помиловати и не отвержи моего воздыханія, никтоже бо, притекаяй къ Тебѣ, посрамленъ отъ Тебе исходитъ, но проситъ благодати и пріемлетъ даръ на пользу прошенія. Аминь.

 

Hosted by uCoz