Каѳисма 17.

Псаломъ 118.

Блажени непорочніи, въ путь ходящіи въ законѣ Господни, блажени и послѣдствующіи святымъ добродѣтелемъ Матери Божіей; блажени подражающіи смиренію Ея; блажени причастницы благостыни Ея; блажени любители кротости сердца Ея; блажени, иже обѣтами святыми служатъ Ей; блажени, имѣющіи на Ню твердое упованіе и благую надежду; блажени, ихже воспріиметъ въ Свое предстательство Царица небесная. О, всемилостивая Владычице! да изліются на насъ оныя благодатныя милости Твоя и насладимся оныхъ, яко о всякомъ богатствѣ.

Воздаждь намъ, рабомъ Твоимъ, Госпоже, сію Твою великую благодать, воеже съ любовію творити святую волю возлюбленнаго Сына Твоего; не скрый отъ насъ щедроты Твоя и уразумѣемъ чудеса Твои на насъ, возжела душа наша присно воспѣвати хвалу Твою, чрезъ Тебе бо спасеніе наше о Господѣ. Что воздадимъ Тебѣ о всѣхъ, яже воздала еси намъ? Законъ матернія воли Твоя, о, Святыхъ Святѣйшая, положила и утвердила еси въ сердцахъ нашихъ; приклони души наша къ вышней любви и отврати очи наши, еже не видѣти суеты; страхъ Божій да будетъ намъ въ сыновній страхъ и смиренное благоговѣніе къ Тебѣ да утѣшитъ насъ во смиреніи нашемъ. О, всемилостивая Владычице! молимся лицу Твоему и преклоняемъ колѣна сердецъ нашихъ предъ Тобою, помилуй насъ по милости Твоей.

Благодать сотворила еси во всякомъ родѣ и родѣ со всѣми, во истинѣ призывающими Тя, Госпоже, въ помощь; воспоминаемъ и мы, грѣшніи, дивныя чудеса Твоя и утверждаемся во упованіи небесныя надежды; обышедше обыдоша ны напасти, но крѣпкая десница Твоя изъятъ насъ отъ нихъ; благо душѣ нашей, яко тяготою ихъ смиряемся. О, всемилостивая Мати! даждь намъ духовный разумъ, воеже покланятися благости живаго Бога и смирятися предъ отческимъ Его наказаніемъ.

Пѣснь вмѣсто славы.

Радуйся, всеблагословенная Приснодѣво Маріе, Ты еси свѣтъ во тмѣ грѣховнѣй и непостыдная надеждо всѣхъ, на Тя уповающихъ; смиренно молимся Тебѣ: утоли законопреступныя страсти сердца нашего и искушенія плоти и міра отврати; повѣдаютъ намъ законопреступницы глумленія свои, но Ты, Заступнице, даждь намъ чувство плакати о грѣсѣхъ нашихъ, да скончаемся христіанскою кончиною и сподобимся Божію милость получити.

Псаломъ тойже.

Исчезаютъ душа и сердце наше, ищущія спасенія отъ Тебе, Владычице; яви намъ благодатный зракъ Твой, оживи насъ милостію Твоею, во вѣкъ не забудемъ благостыни Твоея; яко аще бы не Ты предстояла, о насъ умоляющи возлюбленнаго Сына Твоего и Бога нашего, погибли бы въ многосуетной жизни нашей; Ты немерцающій свѣтильникъ намъ во тмѣ грѣховнѣй: паче всѣхъ учащихъ насъ уразумѣемъ законъ Божій и отъ заповѣдей Спасителя нашего не уклонимся, аще Ты, Царице небесная, поможеши намъ.

Дивны милости и щедроты Твоя, о, святѣйшая Мати Божія, дивны чудеса Твоя на насъ, близъ еси Ты всѣхъ вѣрныхъ и избранныхъ Божіихъ и вси путіе Твои истина, далече же спасеніе и помощь Твоя отъ нерадившихъ о благоговѣйномъ служеніи и поклоненіи Тебѣ, яко неправедно есть помышленіе ихъ; да пріидутъ же, смиренно молимъ Тя, щедроты Твоя на насъ и живи о Господѣ будемъ. Коль сладка гортани нашей хвала Твоя, паче меда устомъ нашимъ всеблагословенное имя Твое! Воспріими насъ странствующихъ во благо и сохрани отъ адскія непріязни.

Пѣснь вмѣсто славы.

Радуйся, Пресвятая Богородице Маріе, подъ Твою матернюю милость и покровъ съ вѣрою и любовію прибѣгаемъ; днесь, и на всякій день и нощь, и въ часъ смерти нашея Тебѣ душу и тѣло наше вручаемъ, всю надежду во всей жизни на Тя возлагаемъ, яко да Твоимъ заступленіемъ и помощію вся наша дѣла исправятся и премѣнятся по святѣйшей волѣ возлюбленнаго Сына Твоего, Спасителя нашего.

Псаломъ тойже.

Призри на насъ, всемилостивая Госпоже, и помилуй насъ, любящихъ святое имя Твое; всѣмъ сердцемъ нашимъ взываемъ и молимся Тебѣ, Владычице, направи стопы наша на путь спасенія и да не обладаетъ волею нашею всякое беззаконіе. Услышите, небеса, и внуши, земле: якоже младенецъ безъ питательницы не можетъ жити, тако безъ Госпожи нашей Приснодѣвы Маріи не можемъ получити вѣчное спасеніе. Миръ многъ любящимъ, почитающимъ и покланяющимся Царицѣ небеснѣй, подъ защищеніемъ бо Ея пребывающіи далече будутъ отъ вѣчной погибели.

Князи адстіи, обышедше, обыдоша насъ, повсюду сѣти злобы поднебесныя положени суть во уловленіе сердца нашего и души, но отъ призыванія святаго имени Твоего, о, возлюбленная Мати Божія, яко дымъ исчезаютъ козни враговъ. Миръ многъ любящимъ имя Твое и нѣсть имъ соблазна, жива будетъ душа наша и восхвалитъ Тя, премилосердную свою Владычицу; милости Твоя всегда помогутъ намъ; седмерицею днемъ воспѣваемъ Тебѣ хвалы Господни и не оставимъ Тя призывати, помощницу нашу, во всѣхъ днехъ жизни нашея, не заблудимъ бо чрезъ сіе, яко овча погибшее, понеже путіе Твои небесный свѣтъ и истина.

Пѣснь вмѣсто славы.

Радуйся, благодатная Приснодѣво Маріе; кто Тя достойно можетъ возблагодарити и восхвалити? исполнены небеса славы Твоея и исполнена земля милости Твоея, безсѣменнымъ бо пречистымъ рождествомъ Твоимъ отъ тли вѣчныя смерти души наша свободила и въ рай безсмертія водворила еси.

По 17-й каѳисмѣ тропари, гл. 1.

Веселится христіанъ множество, имя Твое, Богородице, на всякъ день призывающихъ и любовію высоты Твоя величающихъ. Ты бо похвала и помощница и предстательница непостыдная еси всѣхъ вѣрою чтущихъ Тя.

Срадуйтеся земнородніи Матери Господней, восхвалите Ю небесныя Силы, прославите царствующіи на земли, пріидите вси, радуйся рцемъ Богородицѣ согласно, вѣрою веселящеся.

Новое небо, вмѣстившее неизреченно сущее на небесѣхъ невмѣстимое Слово, одушевленная палато Владыки твари, преславный и преименитый граде Спаса нашего: небеснаго отечества гражданина мя сотвори.

Молитва.

Пресвятая Госпоже, Владычице Богородице! Къ Тебѣ прибѣгаемъ, Чистая: Ты бо еси стѣна необоримая, предстательство и покровъ всѣмъ, прибѣгающимъ къ Тебѣ съ вѣрою и упованіемъ! Молимъ Тя, Преблагословенная, услыши молитву недостойныхъ рабъ Твоихъ и предстани присно за усошпихъ рабовъ Твоихъ. Ты выну ходатайствуеши о православно-чтущихъ Тя, прибѣгающихъ къ покрову Твоему и теплѣ молящихся Тебѣ въ болѣзнѣхъ, скорбѣхъ и напастѣхъ; но Твое ходатайство, Твое заступленіе наипаче благопотребно намъ по смерти нашей; Ты выну являеши скорую помощь Твою рабомъ Твоимъ и не престаеши всѣмъ молящимся Тебѣ являти Свое благосердіе и изливати великія и богатыя милости Сына Твоего и Бога нашего на всѣхъ вѣрующихъ: на Тя единую по Бозѣ имамы твердую надежду и упованіе: никтоже, Тебѣ моляся, отходитъ отъ Тебе безъ помощи, радости, и утѣшенія, и услажденія. Молимъ Тя, о, Пресвятая Богородице, Владычице міра, надеждо ненадежныхъ, буди убо днесь ходатаицею къ Рождшемуся отъ Тебе за усопшихъ рабовъ Твоихъ, умоли Сына Твоего и Бога нашего дати имъ прощеніе и оставленіе прегрѣшеній. Моли, Богородице, много бо можетъ моленіе матернее ко благосердію Владыки; отъ Тебе бо пріемлетъ Господь всяко слово прошенія, пріими убо и Ты наши молитвы и моленія, приносимыя Тебѣ, Пресвятая Дѣво, отъ всего сердца нашего и всея души нашея за души усопшихъ рабовъ Твоихъ. Молимъ Тя, помози имъ. Владычице, матернимъ Твоимъ ко Господу дерзновеніемъ достигнути тихаго пристанища въ небесномъ Іерусалимѣ; помози имъ, Заступнице усердная, непостыдно предстати на страшнѣмъ и второмъ пришествіи Сына Твоего, идѣже кійждо отъ своихъ дѣлъ или прославится, или постыдится; помози имъ, Благодатная, оправдатися предъ лицемъ Сѣдящаго на престолѣ славы, да не постыдятся предъ Ангелы и всѣми Святыми, предъ всѣмъ міромъ, горнимъ и дольнимъ. О, Всепѣтая Мати, Владычице Богородице, молимъ Тя, заступи, спаси, сохрани и будущія изми муки усопшихъ рабовъ Твоихъ, да не погибнутъ во вѣкъ, но да спасутся Твоими молитвами и прейдутъ отъ смерти въ животъ. Мы же, грѣшніи и недостойніи раби Твои, не отступимъ отъ Тебе, не престанемъ во умиленіи взывати къ Тебѣ: Пресвятая Госпоже, Царице и Владычице! моли Сына Твоего и Бога нашего объ усопшихъ рабѣхъ Твоихъ, да дастъ имъ Господь отпущеніе прегрѣшеній; посли имъ, Благодатная, достигнути вожделѣннаго отечества и узрѣти блага небесныя, ихже око не видѣ, ухо не слыша и на сердце человѣку не взыдоша; моли о нихъ, Богородице, да сподобятся, по Твоему предстательству, вкушати блага сіи во царствіи Сына Твоего, Христа Бога нашего, Ты бо еси единая благословенная въ женахъ многомощная Заступница, надежда, покровъ и прибѣжище всѣмъ, притекающимъ къ Тебѣ,— Ты еси мостъ, преводяй сущихъ отъ земли на небо и райскихъ дверей отверзеніе. Аминь.

 

Hosted by uCoz