Каѳисма 19.

Псаломъ 134.

Хвалите имя Господне, прославляйте и имя Приснодѣвы Маріи, съ молитвами и моленіями прибѣгайте къ Ея святѣйшему величеству, возставитъ Она въ васъ волю благую и не одолѣютъ васъ похоти грѣха; помышляющіи всегда о Ней и радующіися съ благодареніемъ о милостяхъ Ея обрящутъ небесную сладость и миръ въ душѣ и сердцѣ. О, грѣшницы, воздохнемъ къ Ней внутренними чувствіями и молитвами Ея даруется всѣмъ намъ и жизнь благочестивая, и кончина блаженная.

Псаломъ 135.

Исповѣдайтеся Господеви, яко благь и яко благость Свою раздѣляетъ ищущимъ ея чрезъ предстательство Царицы небесныя. О, Владычице! помяни насъ во смиреніи нашемъ и защити отъ адскаго фараона и непріязненной силы его рукою Твоею крѣпкою и мышцею высокою. Поимъ Господеви, славно бо прославися; поимъ и воспоемъ благодарственная и Тебѣ, многомощная Владычице, яко избавльшіися и избавляеміи Тобою отъ злыхъ, державу бо непобѣдимую носиши на рукахъ Твоихъ.

Псаломъ 136.

На рѣкахъ Вавилонскихъ плакаху сѣтующіи Евреи; мы же о грѣхахъ нашихъ возрыдаимъ и смиренно возопіимъ къ Богородицѣ Приснодѣвѣ Маріи, принесемъ Ей плачъ сердца и воздыханіе духа, не обрящемъ бо прощенія во грѣхахъ, ниже вѣчнаго спасенія душамъ безъ благословеннаго плода чрева Ея; святыми и благопріятными къ Нему о насъ молитвами Ея достигнути небесныя безконечныя жизни чаемъ, и вѣруемъ, и исповѣдуемъ.

Пѣснь вмѣсто славы.

Радуйся, преукрашенная всѣми добродѣтелями Приснодѣво Маріе, источниче приснотекущій, неисчерпаемый кладезь живоносныхъ водъ, престоле огнезрачный, скинія небесная; молюся Ти со слезами, да милость Твоя утвердитъ слабое мое сердце и святыня Твоя освятитъ убогую мою душу, да не побѣдятъ мя прелести грѣховныя, но да избавлюся Твоими молитвами отъ всѣхъ искушеній злыхъ.

Псаломъ 137.

Исповѣмся Тебѣ, Госпоже, всѣмъ сердцемъ моимъ, яко Тобою обрѣтохъ милости и щедроты Іисуса Христа; услыши словеса моя и воздыханія мои, въ оньже аще день и часъ призову Тя; умножи духовную силу вѣры въ слабой душѣ моей и въ скорбехъ сердца буди животворнымъ утѣшеніемъ ищущему Тя сердцу. О, благотворная Владычице, сотвори мя жити въ мирѣ подъ матернимъ покровомъ Твоимъ.

Псаломъ 138.

Госпоже, искусила мя еси и познала мя еси; Ты познала еси паденія и преступленія моя, но умножишася на мнѣ, грѣшнѣмъ, матернія милости Твоя и разширися на мя благостыня Твоя; азъ взираю, яко блудный сынъ, на небо, но Твоимъ предстательствомъ азъ сокрушаюсь, но Твоимъ вдохновеніемъ азъ упокоеваюся, но воззрѣніемъ на святое изображеніе кроткаго лица Твоего азъ спасаюсъ, но вѣрою и надеждою на Спасителя моего, Егоже ты держиши на рукахъ Своихъ и показуеши мнѣ, грѣшному, въ утѣшеніе, азъ уповаю получити блаженство во вѣки вѣковъ.

Псаломъ 139.

Изми мя, Госпоже, отъ человѣка лукаваго, и отъ врага адскаго соблюди мя: напряже лукъ свой противу мене врагь и лестію своею уловляетъ душу мою; сокруши, Владычице, силы его лукавыя и запни пронырству его, обрати беззаконія его на выю его и въ пропастъ, юже содѣла, да впадетъ вскорѣ; азъ же возрадуюся о Тебѣ и возвеселюся о спасеніи Твоемъ.

Пѣснь вмѣсто славы.

Радуйся, Пресвятая Богородице, Херувимовъ честнѣйшая и Серафимовъ къ Богу ближайшая; Твою славу, достоинство, свѣтлость Твою, щедроты и вся милости Твоя, утѣшенія и благословенія кто достойно воспѣти можетъ? Ты еси океанъ неисчерпаемыхъ чудесъ.

Псаломъ 140.

Госпоже, всесмиренно взываю къ Тебѣ: услыши мя, вонми моленію и прошенію моему; да исправится молитва моя, яко кадило предъ лицемъ Твоимъ, въ вечеръ, утро и полудне, и на всякое время, да не помрачитъ злоба міра сего разумъ мой; сотвори мя, Владычице, всегда разумѣти благоугодное Тебѣ и утверди сердце мое во истиннѣй любви къ Тебѣ.

Псаломъ 141.

Гласомъ моимъ къ Госпожѣ воззвахъ и усердно къ Ней помолихся, проліяхъ предъ Нею слезы моя и сердечную болѣзнь Ей предложихъ, яко адскій злый врагъ блюдетъ пяту мою и повсюду простираетъ противу мене сѣти своя; помози мнѣ, Владычице, да не поткнутся стопы моя предъ нимъ, но да самъ сокрушится подъ ногами моими, трепещетъ бо имени и силы Твоея.

Псаломъ 142.

Госпоже, услыши молитву мою, внуши моленіе мое, яко погна врагъ душу мою, силится препяти мя на пути къ вѣчному спасенію, отяготи сердце мое мракомъ своимъ и уны зѣло духъ мой; не отврати, Владычице, лица Твоего отъ мене, да не впаду съ нисходящими въ адскій ровъ, но посли свѣтъ Твой и благодать Твою, и исчезнетъ предо мною мракъ его и соблюдется животъ и разумъ мой.

Пѣснь вмѣсто славы.

Радуйся, Приснодѣво преславная, возлюбленная Мати Божія благодатная, паче меда и сота сладчайшая, паче солнца прекраснѣйшая, паче луны свѣтлѣйшая, паче звѣздъ блистательнѣйшая, паче кипариса и всѣхъ ароматъ благовоннѣйшая; сотвори, Всемилостивѣйшая, сотвори, да ради воспоминанія пресвятаго имени Твоего вся суеты и утѣхи міра сего презрю и всѣмъ сердцемъ отрину, воскриляя всего себя къ небеснымъ.

По 19-й каѳисмѣ тропари, гл. 5.

Увы мнѣ, что сотворю окаянный, кое начало моего спасенія сотворю, непотребно все проходя житіе мое? Не отвержи мене, Благая, заблуждшаго и погибающа, и покаянія мнѣ образы покажи, Мати Божія, яко да во хваленіи славлю Тя всегда.

Виждь, Госпоже, мое сокрушеніе, и уврачуй озлобленнаго демонскими прилогами и плотскими лютыми страстьми, отъ нихже болѣзньми облагаемъ, скорби исполненъ есмь, и многаго унынія, и тѣсноты помраченія. Но едина Бога рождшая, всякія вземшаго во плоти Своей язвы и недуги человѣковъ, Того умоли дати мнѣ миръ и велію милость.

Радуйся божественное Владыки пребывалище, славо Ангеловъ и человѣкъ упованіе и крѣпость въ нуждахъ, твердое предстательство всѣхъ насъ, утвержденіе и стѣно на Тя надѣющихся, прибѣжище вѣрныхъ, благолюбивая Мати Бога человѣколюбиваго: Того умоли даровати рабомъ Твоимъ миръ и велію милость.

Молитва.

О, Всемилостивая Госпоже, Царице небесе и земли, Владычице Ангеловъ и человѣковъ! Тебе, премилосердая Заступнице наша, Господь нашъ Іисусъ Христосъ, при распятіи Своемъ, вручи ученику Своему Іоанну, глаголя ему: се Мати твоя, а чрезъ него и всѣмъ православнымъ христіаномъ нарекъ Матерію ихъ, да вси, съ вѣрою и дюбовію притекающіи подъ державный покровъ Твой, спасаются и избавляются отъ веякихъ бѣдъ и напастей. Сего ради и азъ, недостойный именоватися сыномъ Твоимъ, паче же рабъ окаянный и непотребный, безчисленными грѣхми осквернившій умъ и сердце свое, унылый и лѣнивый на всякое дѣло благое, дерзаю прибѣгнути подъ кровъ Твой, Мати милосердія и благости, со умиленіемъ и сокрушеніемъ сердца прося и моля не отринути мя кающася. Зриши струпы и гноенія окаянныя души моея, слышиши и вопль болѣзненнаго сердца моего. Посѣти мя матерними Твоими щедротами, ихже недостоинъ сотворихся — безумный и отступникъ заповѣдей Сына Твоего и Бога моего. Но якоже не презрѣла еси молитвы Ѳеофила, отвергшагося Твоего Сына и Господа и Тебе, пренепорочныя Матери Его, испросивши ему прощеніе страшнаго грѣха сего: сице не презри и мене, Владычице, возлагающа на Тя все упованіе мое, не отвержи мене, яко раба неключимаго, второе распинающаго Сына Твоего грѣхми моими, не возгнушайся злосмрадіемъ моимъ. Вѣрую, усердная Заступнице, яко вся возможеши испросити у Сына Твоего, елика восхощеши. Аще Соломонъ царь, человѣкъ сый, изрекъ матери своей: проси у мене, мати моя, еже хощеши, и дамъ ти; кіихъ благь не даруетъ Тебѣ, Владычице Благая, и каковаго прошенія Твоего не исполнитъ Твой Сынъ, Царь небесе и земли, Всемогущій, Милосердый и Человѣколюбивый? Емуже подобаетъ всякая слава, честь и поклоненіе со безначальнымъ Его Отцемъ и всесвятымъ, и благимъ, и животворящимъ Духомъ въ безконечные вѣки. Аминь.

 

Hosted by uCoz