Каѳисма 20.

Псаломъ 143.

Благословенна еси, Госпоже, яко научаеши насъ, рабовъ Твоихъ, на брань противу міра, плоти и діавола: противу міра, еже бы отвращати очи отъ прелестей его, не привязывати сердце къ суетамъ его; противу плоти, еже бы содержати себе въ цѣломудріи и не касатися заповѣданныхъ вещей; противу діавола, еже бы разумѣвати искушенія его и соблазны и дѣйствію ихъ всевозможно противитися. О, всемощная Владычице! молимъ Тя и молити не престанемъ, блесни молнію силы Твоея и разжени ихъ, посли стрѣлы скораго защищенія Твоего и порази ихъ, прослави отъ высоты святыя славы Твоея въ сей брани крѣпкую десницу Твою, да, воспѣвая, воспоемъ мы, раби Твои, избавльшеся отъ злыхъ, силу, славу и хвалу Твою; вѣси, Владычице, колико мы грѣхопоползновенны есмы и многопотребна намъ помощь Твоя; воспламени въ сердцахъ нашихъ желанія небесныя и исполни духомъ сладости райскія.

Псаломъ 144.

Вознесу Тя, возлюбленную Матерь Сына Божія, и на всякъ день воспою Тебѣ хвалы; по всей земли людіе прославляютъ дѣла и милости Твои и острови мнози величаютъ чудеса Твоя, Ангели и Архангели проповѣдуютъ святыню души Твоея и вси святіи провозвѣщаютъ кротость и смиреніе Твое; очи наши уповаютъ на Тя, Госпоже, пошли намъ брашно и пищу во благо время, алчущую же душу напитай и насыти небесною сладостію и мы, раби Твои, благословимъ Тя, яко премилосердную Матерь, во вѣки вѣковъ.

Пѣснь вмѣсто славы.

Радуйся, Пресвятая Приснодѣво Маріе, возлюбленная Мати Спасителя Христа Бога нашего, кристалловидный источниче, небесными сладостями исполненный, райскій вертограде, преиспещренный всѣми святыми добродѣтелями, мысленное небо, души и сердца увеселяющее! О, прекраснѣйшая и преблагословенная въ женахъ! осѣни мя, грѣшнаго, лучами благостыни Твоея, да въ тишинѣ и мирѣ пребуду въ сей странѣ и въ сѣни смертнѣй и потомъ, Тебѣ помогающей, достигну отечества небеснаго.

Псаломъ 145.

Хвали, душе моя, Госпожу Приснодѣву Марію, непрестанно хвали, дондеже обитаеши въ тѣлѣ семъ; егда же изыдеши изъ темницы бренныя плоти, Она предстанетъ тебѣ, яко заступница, и въ пути незнаемѣмъ будетъ надежная предводительница, полки лукавыхъ бѣсовъ предъ свѣтомъ Ея исчезнутъ и проведешися безъ страха до вратъ вѣчнаго мира. Слава, хвала и честь Царицѣ небеснѣй, Яже Собою милостивно приведетъ насъ въ царствіе небесное.

Псаломъ 146.

Хвалите Госпожу Приснодѣву Марію, яко благь есть псаломъ; услажденна и красна сицевая Ей хвала; сія бо есть помощница сокрушенныхъ сердцемъ и умащаетъ ихъ благовоннымъ мѵромъ благоволенія о нихъ; велики милости Ея, благодать и щедроты Ея не имутъ конца; предварите Ей въ воскликновеніи, во исповѣданіи псалмовъ пойте Ей, благоволитъ бо Царица небесная въ прославляющихъ Ю и уповающихъ на милости Ея.

Псаломъ 147.

Хвали, Церковь Божія, возлюбленную Матерь Спасителя Христа, прославляй Ю, новоблагодатный Сіоне: сынове бо твои благословятся отъ Нея и распространятся отъ моря до моря, миромъ благимъ благоукрасятся и надежда ихъ не постыдится, въ родъ и родъ восхвалятъ Тя.

Пѣснь вмѣсто славы.

Преславная Богородице, Приснодѣво Маріе, жизни нашея вожде, Божія благодати ходатаице, моря міра сего волнующагося благоотишное пристанище, испроси у возлюбленнаго Сына Твоего, Спасителя нашего, милость намъ, грѣшнымъ, да въ вѣрѣ, надеждѣ и любви къ Нему пребудемъ непоколебими и кончины христіанскія удостоимся.

Псаломъ 148.

Хвалите Госпожу Марію отъ небесъ, хвалите Ю въ вышнихъ, идѣже сѣдитъ на престолѣ неприступныя славы, въ ризахъ позлащенныхъ одѣяна и преукрашена; хвалите Ю вси человѣцы, и скоти, и птицы небесныя, и рыбы морскія; хвалите Ю солнце и луна, хвалите Ю звѣзды и свѣтъ, хвалите Ю Херувими и Серафими, Престоли, Господствія и Власти, хвалите Ю вси Ангели и Архангели и вся чины воинствъ небесныхъ; слава, хвала и честь Приснодѣвѣ Маріи.

Псаломъ 149.

Воспойте Госпожѣ нашей и Царицѣ великой пѣснь новую; хвала Ея въ сонмѣ праведныхъ, веселятся небеса о славѣ Ея, острови морстіи и вся вселенная, вода и огнь, мразъ и зной, молнія и свѣтъ прославляютъ Ю. Возношеніе Ея въ гортани праведныхъ и хвалы Ея въ ликахъ всѣхъ святыхъ; граде Божій, Сіоне небесный, торжествуй о Ней вѣчно въ пѣснехъ хваленія.

Псаломъ 150.

Хвалите, правовѣрніи, великую Госпожу, сильную Владычицу, небесную Царицу, премилосердную вашу Матерь, скорую помощницу, усердную заступницу, пречистую и преблагословенную Приснодѣву Марію, хвалите высокія добродѣтели и великія чудеса Ея; хвалите Ю чины патріарховъ и пророковъ, хвалите Ю апостоли и святители, хвалите Ю мученицы и исповѣдницы, хвалите Ю дѣвственницы и воздержницы, хвалите Ю пустынницы и монаси, хвалите ІО вси вѣрніи всякаго сословія, хвалите Ю младенцы и всѣ праведныя души небесныхъ гражданъ; всякое дыханіе да хвалитъ пресвятаго Господа, да хвалитъ и благодатную Приснодѣву Марію, аминь.

Пѣснь вмѣсто славы.

Преблагословенна еси, Госпоже Маріе, возлюбленная Мати Господа нашего Іисуса Христа, Иже, воплощся изъ Тебе, посѣти насъ и сотвори вѣчное избавленіе намъ, людемъ Своимъ, Иже Тя воздвиже отъ дому Давида, отрока Своего, Иже исполни Тобою клятву, еюже клятся ко отцемъ нашимъ, Аврааму и сѣмени его даже до вѣка, Иже низложи сильныя со престолъ и превознесе Тя, смиренную, на небеси и на земли; и Ты, благодатная Приснодѣво Маріе, великая пророчица отъ насъ именуешися, понеже предрекла еси, яко вси роди ублажатъ Тя, и ублажаемъ, и ублажати Тя не престанемъ. О, звѣздо утренняя, присносіяющая на небеси и на земли, освѣщай насъ лучами помощи Твоея во дни и въ нощи, да не заблудимъ въ конецъ во мрацѣ грѣховныя суеты; Ты бо еси слава небеснымъ и намъ, земнымъ, непостыдное упованіе; много бо можетъ Твоя матерняя молитва на умоленіе о насъ небеснаго Владыки, Емуже, яко Премилосердному Богу нашему, и Тебѣ, яко усердной Заступницѣ нашей, да будетъ отъ насъ, грѣшныхъ, честь и слава во вся вѣки вѣковъ. Аминь.

По 20-й каѳисмѣ тропари, гл. 8.

Божественнаго свѣта свѣтильниче златозарный, Пренепорочная Госпоже, душу мою, омрачаемую мглою страстей, безстрастія свѣтлостію озари, молюся, и окаянное сердце мое омый слезами покаянія: Тя бо имамъ надежду рабъ Твой.

Горесть тамошнихъ мукъ и жестокость мучителей, тму несвѣтимую и всегдашнюю, негрѣющій и леденящій тартаръ, ядоносный и неусыпающій червь, страшный скрежетъ зубовъ, пламень геенскій и нестерпимое жженіе, ужасный вопль и рыданіе, разлученіе отъ праведныхъ и наслѣдія ихъ лишеніе помышляющи, содрогнися душе моя, и стенаньми и плачемъ Матерь Судіи умоли, зовущи: Богородице, испроси ми прощеніе злыхъ, къ покрову Твоему съ вѣрою притекающему.

Райскими добротами наслаждатися и въ небесныхъ чертогахъ обитати, Владычице, подаждь ми, Бога божественный чертоже, улучити же блаженный невѣстникъ сподоби и причащатися тамо славы Христовы и насыщатися сладчайшихъ лучей и сіянія неизреченныя красоты Его, яко да радуяся пою вѣчно со Ангелы Отца, и Сына, и Святаго Духа, Троицу нераздѣльную, изъ несущихъ премудрѣ вся осуществовавшую, и Тебе присно славлю, Богопрославленная.

Молитва.

Пресвятая Владычице моя Богородице, святыми Твоими и всесильными мольбами отжени отъ мене, смиреннаго и окаяннаго раба Твоего: уныніе, забвеніе, неразуміе, нерадѣніе и вся скверная, лукавая и хульная помышленія отъ окаяннаго моего сердца и отъ помраченнаго ума моего; и погаси пламень страстей моихъ, яко нищь есмь и окаяненъ. И избави мя отъ многихъ и лютыхъ воспоминаній и предпріятій, и отъ всѣхъ дѣйствъ злыхъ свободи мя, яко благословенна еси отъ всѣхъ родовъ, и славится пречестное имя Твое во вѣки. Аминь.

 

Hosted by uCoz