Молитва ко Пресвятѣй Богородицѣ отъ человѣка, въ путь шествовати хотящаго.

(Должна прочестися со всякимъ умиленіемъ и усердіемъ).

О, Пресвятая Владычице моя, ДѢво Богородице, Одигитріе, покровительнице и упованіе спасенія моего! Се въ путь, мнѣ предлежащій, нынѣ хощу отлучитися и на время сіе вручаю Тебѣ, премилосердой Матери моей, душу и тѣло мое, вся умныя моя и вещественныя силы, всего себе ввѣряя въ крѣпкое Твое смотрѣніе и всесильную Твою помощь. О, благая спутнице и защитнице моя! Усердно молю Тя, да не ползокъ путь мой сей будетъ, руководствуй мя на немъ, и направи его, Всесвятая Одигитріе, якоже Сама вѣси, ко славѣ Сына Твоего, Господа моего Іисуса Христа. Буди ми во всемъ Помощнице, наипаче же въ семъ дальнемъ и многотрудномъ путешествіи соблюди мя подъ державнымъ покровомъ Твоимъ отъ всякихъ находящихъ бѣдъ и скорбей, отъ врагь видимыхъ и невидимыхъ, и моли о мнѣ, Госпоже моя, Сына Твоего Христа Бога нашего, да послетъ въ помощь мнѣ Ангела Своего мирна, вѣрна наставника и хранителя, да якоже древле даровалъ есть рабу Своему Товіи Раѳаила, на всякомъ мѣстѣ и во всякое время хранивша его въ пути отъ всякаго зла: тако и мой путь благополучно управивъ и сохранивъ мя небесною силою, — здрава да возвратитъ мя, мирна и всецѣла къ жилищу моему во славу имени Своего святаго, славяща и благословяща Его во вся дни живота моего и Тебе величающа нынѣ и присно, и во вѣки вѣковъ. Аминь.

Молитва, глаголемая предстоящими на божеств. литургіи, послѣ возгласа: Изрядно о Пресвятѣй...

(Изъ Кіевскаго Молитвослова).

Богородице Дѣво, радуйся, благодатная Маріе, Господь съ Тобою: благословенна Ты въ женахъ, и благословенъ плодъ чрева Твоего, яко Спаса родила еси душъ нашихъ.

Радуйся едина пречистая, Мати единаго Содѣтеля, Господа Бога и Спаса нашего Іисуса Христа: буди ми ходатаица въ день страшнаго испытанія, егда предстану нелицемѣрному Судіи, яко да огненнаго прещенія избавлюся молитвами Твоими, едина благословенная.


 

Hosted by uCoz